26 aprel 2011 13:38
Robertas Poşkus: AZAL-dan bütün acıqlarımızı çıxacağıq
Son ölkə çempionu “İnter”in hücumçusu Robertas Poşkus azerisport.az saytına müsahibəsində Premyer Liqanın son turunun “Qarabağ”la, eləcə də kubokun qarşıdan gələn AZAL ilə oyunu barədə fikirlərini açıqlayıb.
- AZAL-la kubokun yarımfinal matçından nə gözləyirsiz?
- Əlbəttə, qələbə. Komanda bu oyuna yaxşı hazırlaşıb. Biz ilk oyunda meydana mütləq qələbə üçün çıxmağı və onu əldə etməyi planlaşdırmışıq.
- AZAL-ı sizin üçün uğursuz rəqib saymaq olar? Bu mövsüm bir dəfə 5, bir dəfə 1 cavabsız qolla uduzmusuz, bir dəfə də heç-heçə etmisiz - 1:1...
- Bəli, bu mövsüm onlarla oyunlarımız alınmır. Lakin biz bu dəfəki oyunda bütün acıqlarımızı çıxmağa çalışacağıq. Biz əvvəlki uğursuzluqlarımızın qisasını almağa çalışacağıq.
- Son turun “Qarabağ”la oyununda daha çox müdafiədən oynayırdınız. Kubok matçında da sizdən eyni taktika gözləyək?
- Xeyr. “Qarabağ”la görüşdə biz müdafiədən oynamırdıq. Sadəcə elə alınırdı ki, biz daha çox müdafiə olunurduq və elə görünürdü ki, müdafiədən oynayırdıq. Bunda isə daha çox rəqibin rolunu vurğulamaq lazımdı. AZAL ilə oyunda isə eyni halın təkrarlanacağını düşünmürəm. Özü də ilk oyunu doğma divarlar arasında oynayacağıq. Bu isə o deməkdi ki, biz hücum futbolu oynamalı, qələbə qazanmalıyıq.
- Ümumiyyətlə, bu oyundakı məğlubiyyəti nə ilə əlaqələndirərdiz?
- Minimal hesabla məğlub olduq. Halbuki, biz də ən azı iki dəfə qol vurmağa yaxın idik. Məsələn, Aleksandr Çertoqanovun epizodunda o, qapıçıyla üz-üzə qalmışdı. Yaxud David Odikadzenin istifadə edə bilmədiyi epizod olsun. Amma sonda penaltidən vurulan qolla məğlub olduq.
- Sizin fikrinizcə, Əfran İsmayılovun fərqləndiyi epizodda ofsayd var idi yoxsa təmiz qol idi?
- Bilirsiz, mən həmişə demişəm ki, hakimlərin işini müzakirə etməyi sevmirəm. Qoy bununla cavabdeh orqanlar məşğul olsun. Həmin epizoda gəlincə, mən o anda meydanın mərkəzində idim və təbii ki, orda oyundankənar olub-olmadığını dəqiq deyə bilməzdim. Heç oyunun təkrarına da baxmamışam. Odu ki, dəqiq nəsə deməkdə çətinlik çəkirəm.
- Sizcə, komandanız 2 həftədə 4 qarşılaşmanın yükünə dözə biləcək?
- Buna hazır olmalıyıq. Əlbəttə, 3-4 gündən bir oyuna çıxmaq elə də asan olmayacaq. Amma biz istənilən halda bu qrafiklə oynamağa məcburuq.
