26 aprel 2011 18:07
İbrahim Banqura: Mən şəxsən Azərbaycana buna görə gəlmişəm
“Xəzər Lənkəran”ın qvineyalı yarımmüdafiəçisi İbrahim Banqura azerisport.az saytına müsahibəsində Azərbaycan kubokunun “Bakı” ilə qarşıdakı oyun ərəfəsində komandasının şanslarını dəyərləndirib.
- “Bakı” ilə kubok oyunu öncəsi nə düşünürsüz?
- Premyer Liqanı müvəqqəti də olsa yaddan çıxarmalı və “Bakı” ilə oyunlara köklənməliyik. Çünki rəqib ciddidi.
- İlk oyun üçün qarşınıza hansı məqsədi qoymusuz?
- İlk oyunu doğma divarlar arasında keçirəcəyik. Bu üzdən istənilən halda mütləq qələbə qazanmalıyıq. Hətta minimal hesablı qələbə də bizim üçün uğursuz nəticə olmayacaq.
- Təvazökarlıq etmirsizmi?
- Bu, minimal variantdı. Amma mümkün qədər iki, üç və ya dörd top fərqi ilə də qalib gəlməyimiz lazımdı. Nə qədər çox qol vursaq, bir o qədər yaxşıdı. Cavab oyunu öncəsi bu bizim işimizi daha da asanlaşdıra bilər.
- Ümumiyyətlə, bu turnir sizin üçün nə dərəcədə vacibdi? “İnter”, AZAL və “Bakı”dan fərqli siz artıq avrokuboklara vəsiqəni də təmin etmisiz...
- Mövsümü titulla bitirmək istənilən halda çox xoşdu. Bizim üçün bütün turnirlər vacibdi. Mən şəxsən Azərbaycana buna görə gəlmişəm. Hazırkı klubum ambisiyalı olmasıyla seçilir. Heç kimə nəyisə güzəştə getməyə hazırlaşmırıq.
- Siz bu rəqiblə cəmi 1 dəfə qarşılaşmısız. Rəqibin heyətində kimi qeyd edərdiniz?
- Jabanı. Təhlükəli hücumçudu. Mən onu hələ Türkiyədə oynadığımız dövrdən tanıyıram. Bütövlükdə də “Bakı” pis komanda deyil. Digər “altılıq” komandaları kimi onların da güclü heyəti var. Amma biz hamıdan güclüyük. Məncə, digər komandalar kimi bakılılar da bizimlə görüşdə müdafiədən oynayacaqlar.
- Premyer Liqaya qayıdaq. “Neftçi”ni çempionluq münasibətilə təbrik etmək olar?
- Hələ yox. Səkkiz xallıq fərq əlbəttə ki, ciddi göstəricidi. Amma “Neftçi” iki oyunda uduzsa, hər şeyi dəyişə bilər. Əgər bu alınmasa, onda ikinciliyimizi qorumalı olacağıq. Hansı ki, bunu da pis nəticə saymaq olmaz.
- Yəqin ki, bu yolda “Qarabağ”la mübarizəniz da asan keçməyəcək...
- Bu komanda da ciddi rəqibdi. Onların da Lənkərana səfəri var. Burda aydınlaşdırarıq. Əgər qalan 4 oyunda da AZAL ilə görüşdəki kimi oynasaq, onda bizim üçün hər şey yaxşı alınacaq.
