26 aprel 2011 11:34
Mirça Rednik Lənkəranda ilkə imza atdı
Azərbaycan Premyer Liqasının XXVIII turu “Xəzər Lənkəran” üçün növbəti böyük hesabli qələbə ilə əlamətdar oldu. Azerisport.az xəbər verir ki, bu komanda mövsümdə 2-ci dəfə rəqibini 3 top fərqi ilə məğlub edə bildi.
Mirça Rednikin baş məşqçi postuna keçməsindən sonra ilk “qurbanı” MOİK olan komanda yenə paytaxt təmsilçisini, lakin bu dəfə AZAL-ı üstələdi. Çempionatın 5-ci turunun MOİK-lə görüşündə olduğu kimi yenə hesab 3:0 oldu. Ötən il sentyabrın 12-dəki həmin zəfərdən sonra azarkeşlər 223 gün idi ki, belə qələbənin intizarında idi. Bu müddətdə 25 rəsmi matça çıxan cənublular 3 və ya daha çox top fərqi ilə qalib gələ bilmirdi.
MOİK-lə qarşılaşma AZAL-la olduğu kimi ev oyunu olsa da həmin matç Suraxanı qəsəbə stadionunda keçirilmişdi. Bu isə o deməkdi ki, Lənkərandakı son böyük hesablı qələbə daha əvvəl baş verib. Bu, ötən mövsümün gedişində qeydə alınıb. Final mərhələsinin “ilk altılığ”ının 1-ci turunda “Qəbələ” ilə görüşən XL 4:1 hesabına sevinmişdi. Martın 12-dəki həmin zəfərdən sonra lənkəranlı azarkeşlər növbəti böyük hesablı qələbəni 407 gün gözləməli oldular. Bu qələbə Rednikin Lənkəranda ilk böyük hesablı qələbəsidi.
Qeyd edək ki, cari mövsüm çempionatda 2-ci belə qələbəsini qazanan “Xəzər Lənkəran” iştirak etdiyi bütün çempionatlarda ən azı 1 böyük hesablı qələbə qazanıb.
2004/05 – 8
2005/06 – 1
2006/07 – 6
2007/08 – 5
2008/09 – 5
2009/10 - 4
2010/11 – 2
Cəmi - 31
Bundan başqa “Xəzər Lənkəran” ölkə kubokunda da 10 böyük hesablı qələbə qazanıb:
2004/05 – 0
2005/06 – 2
2006/07 – 3
2007/0/8 – 3
2008/09 – 2
2009/10 – 0
2010/11 - 0
İndiyəqədərki “qurbanlar” arasında heç vaxt AZAL olmamışdı. Bu, “təyyarəçilər”lə görüşlərdəki ilk darmadağındı. (XL-ın rəsmi saytı)
