26 aprel 2011 12:37
Beşiktaş`da növbəti qalmaqal: Nihat Kuaresmaya hücum çəkdi (FOTO)
Türkiyə Superliqasının dünən keçirilən “Konyaspor”la səfər matçı “Beşiktaş” üçün yeni qalmaqalla yaddaqalan olub. Azerisport.az xəbər verir ki, cari mövsümün ən uğursuz komandalarından birinə çevriən “qara qartallar”ın təcrübəli hücumçularından Nihat matçın gedişində Kuaresmaya hücum çəkərək, onunla əlbəyaxaya çıxıb.
Matçın 52-ci dəqiqəsində oyuna daxil olan Nihat Kahveçi bundan 15 dəqiqə sonra Rikardo Kuaresma ilə birlikdə hücuma çıxarkən oyundaşından ötürmə ala bilməyincə əsəblərini cilovlaya bilməyib. Nəticədə bir-biriylə əlbəyaxaya çıxan tərəfləri sonuncunun həmyerlisi Fernandes ayırıb.
Matçdan sonra Nihat münaqişə ilə bağlı bunları dilə gətirib: "İkinci yarı daha yaxşı oyun sərgilədik. Əlimizdən gələni etməyə çalışdıq. 10 nəfər qalınca oyunu riskə atdıq. Amma qalib gələ bilmədik. Kuaresma ilə bağlı epizodda isə pas istədim. Onun həmin anda mənə göstərdiyi reaksiya sonrası belə olay meydana çıxdı. Başqa bir problem yoxdu”.
Qeyd edək ki, bu, artıq “Beşiktaş”da cari mövsüm ikinci belə daxili qalmaqaldı. Buna qədər “qara qartallar”ın sabiq kapitanı İbrahim Üzülməz İbrahim Toramanı paltardəyişmə otağında vurduğuna görə klubdan qovulmuşdu. İndi Nihatın da mövsümün sonunda eyni şəkildə komandadan kənarlaşdırılacağı bildirilir.
