27 aprel 2011 13:40
Kamran Ağayev: Heç kim bizə qarşı açıq futbol oynaya bilmir
Milli komandamızın və “Xəzər Lənkəran”ın qapıçısı Kamran Ağayev “Bakı” ilə kubok oyunu ərəfəsində komandasının şanslarını dəyərləndirib. Azerisport.az saytına müsahibəsində o, bunları dilə gətirib:
- “Bakı” ilə oyuna necə hazırlaşmısız?
- Komandamız həmişəki qaydada hazırlaşıb. Biz ölkə kubokunun yarımfinalında mümkün qədər yaxşı çıxış etməyi hədəfləmişik. Aydın məsələdi ki, ilk oyunda mütləq qələbə qazanmalıyıq. Amma bu mərhələni bütövlükdə uğurla başa vurmağımız lazımdı. Rəqibimiz də adi komanda deyil. Əminəm ki, “Bakı” Lənkərana böyük ambisiyalarla gəlib.
- Komandanızın cütün taleyini elə ilk oyunda həll etmək şanslarını necə qiymətləndirirsiz?
- Kubok oyunlarında proqnoz vermək çox çətindi. Yarımfinala yüksələn komandalar zəif ola bilməz. Ola bilər ki, hətta evdə uduzaq, amma səfərdə qələbə qazanaq. Başlıcası finala çıxmaqdı. Şansları qiymətləndirmək asandı, amma meydana çıxıb oynamaq, bunu sübut etmək bir qədər çətindi. Hər bir yarımfinal oyunu finala aparır. Biz də bu yolu layiqli şəkildə keçmək istəyirik.
- Cari mövsüm “Bakı” heç də inamlı təsir bağışlamır. Demək olar ki, XL bu cütün favoritidi?
- Xeyr, belə deməzdim. “Bakı” indi tam olaraq kuboka köklənib. Heç bir komanda mübarizə aparmadan finala yüksələ bilməz. Bütün yarımfinal oyunları prinsipial xarakter daşıyır. Buna görə də düşünürəm ki, nə XL – “Bakı”, nə də “İnter” – AZAL matçına adi gözlə baxmaq lazım deyil. Hər iki qarşılaşma böyük əhəmiyyət daşıyır. Bizim məqsədimiz “zolaqlılar”ı keçməkdi. Bunun üçün isə meydanda maksimum gücümüzü qoymalıyıq.
- “Bakı” ilə oyunlar sizin üçün həm də prinsipiallığı ilə seçilir...
- Bütün oyunlarımız bizim uçun vacibdi. Ötən mövsüm nə olmuşdusa, geridə qalıb. Onları unutmaq lazımdı və qarşıdakı oyunlara köklənməliyik. “Bakı” ilə həmin oyunlarımızı heç xatırlamaq da istəmirəm. Ona görə də “Bakı” ilə oyuna adi qaydada hazırlaşırıq. Hər dəfə ötən mövsüm olanları xatırlamaq lazım deyil.
- Sizcə, XL “Bakı”nı nəyin sayəsində keçə bilər?
- Fikrimcə, “Bakı”nı ancaq ağıllı və layiqli oyun sayəsində mübarizədən kənarlaşdıra bilərik. Məgər “Xəzər Lənkəran” indiyə kimi bunu bacardığını sübut etməyib ki? Biz finala daha çox layiq olduğumuzu isbatlamaq istəyirik. Yaxşı heyətimiz var. Özü də ilk oyunu doğma divarlar arasında oynayacağıq. Bundan maksimum yararlanmalıyıq.
- Çoxları iddia edir ki, “Bakı” XL üçün uğursuz rəqibdi. Siz də belə düşünürsüz?
- Bu, düzgün fikir deyil. Sadəcə onlar bizimlə oyunlara ikiqat güclə hazırlaşırlar. Lənkəranda 4-5 müdafiəçiylə oynayırlar. Heç kim bizə qarşı açıq futbol oynaya bilmir. Hamı müdafiəyə oturub hücum üçün zamanını gözləyir. “Bakı”nın uğursuz rəqib olmasına gəlincə, XL üçün bütün rəqibləri eynidi.
