27 aprel 2011 11:31
Xəzər Lənkəran`da yeni ad (FOTO)
“Xəzər Lənkəran”ın gənc futbolçusu Şəhriyar Xəlilov “ağ-yaşıl” formada ilk oyununu keçirib. Azerisport.az xəbər verir ki, o, Azərbaycan Premyer Liqasının 28-ci turunun AZAL-la qarşılaşmasında debüt edib.
Bu komandaya qışda transfer olunan Şəhriyar matçın 86-cı dəqiqəsində meydana daxil olub. Bununla da o, rəsmi matçlarda “Xəzər Lənkəran” forması geyən oyunçuların siyahısına daxil olub.
Bu matçadək 125 oyunçuya XL-ın şərəfini qorumaq nəsib olmuşdu. Xəlilov bu siyahıya 126-cı kimi daxil oldu. O, komandada bu il debüt edənlərin siyahısında isə 13-cüdü. 2011-ci ilin arxada qalan hissəsində Simao Bruno, Andrey Mureşan, Adrian Pit, Xristu Kyaku, Adrian Skarlatake, Julius Vobay, Elnur Abdullayev, Aleksandr Pitsurka, İbrahima Banqura, Kosmin Fransinesku, Nikulae Muşat və Yevgeni Kopil də “Xəzər Lənkəran”da debüt etmişdilər.
Xəlilov komandanın 62-ci yerli futbolçusu olub. “Xəzər Lənkəran”da oynamış digər 64 oyunçu isə legionerdi.
