27 aprel 2011 11:49
Georgi Nikolov: İnter AZAL-dan daha güclüdü
Son ölkə çempionu “İnter”in prezidenti Georgi Nikolov azerisport.az saytına müsahibəsində komandasının ölkə kubokunun AZAL ilə oyunu ərəfəsindəki şanslarını dəyərləndirib.
- AZAL bu il “İnter” üçün ən uğursuz rəqiblərdən birinə çevrilib. Necə düşünürsüz, bu, nə ilə bağlıdı?
- Mənə elə gəlmir ki, uşaqlarda AZAL ilə bağlı hansısa kompleks yaranıb. Sadəcə, Nazim Süleymanovun komandası iki oyunda müəyyən komponentlərə görə bizi üstələyirdi. Lakin bütün bunlara baxmayaraq, mən komandamızın daha güclü olduğunu görürəm və biz qarşıdakı oyunlarda da bunu sübut etməliyik.
- Amma AZAL bu mövsüm sizdən kifayət qədər xal alıb...
- Düzdü, onlar bizi lazım olan hər şeydən məhrum ediblər. Lakin bizim də həmin məğlubiyyətlərin əvəzini çıxmaq üçün kubokda gözəl şansımız var.
- Sizcə, komanda finala çıxmaqla bu uğursuz mövsümü unutdurmağı bacaracaq?
- Təbii ki, Azərbaycan kubokunu qazana bilsək, yüz faiz əminliklə deyə bilərəm ki, cari mövsümü xilas etmiş olarıq. Belədə biz son illərdəki ənənəmizi davam etdirmiş olacağıq. Yəni ardıcıl hər mövsüm titul qazanmaq ənənəmizin davamı gələcək. Hər il çempion olmaq, belə yüksək hədəflərə çatmaq mümkünsüzdü. Əgər “Liverpool” kimi komanda artıq neçə illərdi İngiltərə çempionu ola bilmirsə, daha nədən danışmaq olar?
- Siz dediniz ki, komandada AZAL-a qarşı kompleks yoxdu. Bəs onda “İnter” qarşıdakı oyunlarda necə oynamalıdı ki, bu səddi keçsin?
- Biz baş məşqçiylə bu haqda danışmışıq. Belə qənaətə gəldik ki, Premyer Liqanın son turundakı kimi oynamaq olmaz. “Qarabağ”ın oyunçuları bizimlə qarşılaşmada az qala dişiyə torpağı eşməyə hazır idilər. Amma bizim futbolçular onlarla müqayisədə həddən artıq ziyalı təsir bağışlayırdılar. Futbol oynamaq, üstünü çirkləndirmək zamanıdı.
- Bütün bunları nəzərə alaraq, belə demək olar ki, AZAL “İnter”lə oyunlarda favoritdi?
- Xeyr. Təkrar edirəm: mən “İnter”i daha məharətli, güclü komanda hesab edirəm, nəinki AZAL-ı. O başqa məsələdi ki, ustalıq heç də hər şeyi həll etmir. Amma mən ümid edirəm ki, bizim uşaqlar kubokun finalına çıxa biləcəklər.
