28 aprel 2011 00:47
Ermənistan Prezident kubokunda millimizə rəqib ola bilər
Qazaxıstanın Astana şəhərində keçirilən futbol üzrə “Prezident kuboku”nda artıq bir finalçının adı müəyyənləşib. Azerisport.az xəbər verir ki, final mərhələsinə vəsiqə qazanan ilk komanda məhz Azərbaycanın 17 yaşlılardan ibarət yığması olub.
Təbriz Həsənovun yetirmələrinə bunun üçün İran (2:1) və Qazaxıstanla (3:2) oyunlardakı qələbə yetərli olub. Artıq son turun Özbəkistanla oyunundan asılı olmayaraq, qrup birinciliyini təmin edən futbolçularımızın final mərhələsindəki mümkün rəqibləri arasında isə Ermənistan da var.
Məsələ burasındadı ki, digər yarımqrupda mübarizə aparan komandaların sırasında Ermənistan da uğur qazananlar sırasındadı. İlk iki turdan sonra bütün qrup iştirakçıları 3 xal toplayıb. Top fərqinə görə Gürcüstan birinci yerdə gedir. Onun əsas izləyiciləri isə Ermənistan, Türkiyə və Ukrayna yığmalarıdı. Qeyd edək ki, ikinci turda Türkiyə millisi Gürcüstana qalib gəlib – 2:1. Ermənistan isə Ukraynanı 2 cavabsız qolla məğlub edərək, sensasiyaya imza atıb.
