Rail Məlikov: Bizim üçün yalnız bir rəqib mövcuddu

“Neftçi”nin müdafiəçisi Rail Məlikov “Xəzər Lənkəran”ın oyunçusu Elnur Allahverdiyevin “ağ-qaralar”ın Azərbaycan çempionu tituluna layiq olmaması haqda fikrini şərh edib. Azerisport.az xəbər verir ki, paytaxt klubunun kapitanı cənubluların millimizdə də top qovan üzvünün cavabını belə verib:

 

“Belə hallarda biz adətən atalar sözünə müraciət edərdik: it hürər, karvan keçər... İndi isə it hürmür. Çaqqal ulayır, karvan isə hələ də ötür. Buna qədər XL-in başqa futbolçusu deyirdi ki, penaltilər ancaq bizim xeyrimizə təyin edilir və xatırlamırdı ki, lənkəranlılarla görüşdə penalti bizim qapımıza təyin edilmişdi. Onlar “İnter”lə oynayanda qapılarına təmiz on bir metrlik təyin edilmədi. Biz ki, dinmədik. Çünki biz peşəkarıq - başımızı salıb işimizi görürük.

 

Elnur deyir ki, bizim necə uğur qazanmağımızı hətta bazarda bilirlər? Qoy o unutmasın ki, Lənkəran bazarına gedir. Orada isə XL-in azarkeşləridi. Elnur hesab edir ki, çempionluğa XL və “Qarabağ” layiqdi? Bunu eşidəndə şəxsən mənə gülməli gəlir. Bizim üçün yalnız bir rəqib mövcuddur - bu, “Qarabağ”dı”, deyə o, bildirib.