2 may 2011 13:29
Rəşad Sadiqov: XL-la növbəti oyun da istisna olmayacaq
“Qarabağ”ın kapitanı Rəşad Sadiqov azerisport.az saytına müsahibəsində “Bakı” ilə son oyundan, komandasının şanslarından danışıb.
- Son oyundan belə nəticə gözləyirdiz?
- Biz bilirdik ki, çətin oyun olacaq. Ümumiyyətlə, birinci altılıqda zəif komanda yoxdu. Həm də “Bakı”nın üstündə bizdəki kimi təzyiq yoxdu. Çünki onların çempionatda heç bir şansı qalmadığından oyunlara tam arxayın çıxırlar. Bizdə isə vəziyyət bir qədər fərqlidi. Həmçinin heyətdəki itkilər də sözünü dedi. Məsələn, Türkiyədən yeni qayıdan Rəşad Sadıqov məcburiyyətdən oyuna daxil oldu.
- Elə siz özünüz də ötən turda zədə almışdınız...
- Bəli, mənim zədəm artıq arxada qalmışdı. Amma bu gün dizimdən zədə aldım. Hələ ağrılar hiss edirəm. Baxaq, görək müayinə nə göstərəcək.
- İlk yarının gedişi elə təsir bağışlayırdı ki, siz rəqibi düzgün qiymətləndirməmisiz...
- Belə bir şey ola bilməzdi. Bilirdik ki, “Bakı” heç də zəif komanda deyil. Biz elə birinci hissədə də çoxlu hücumlar edirdik, qol vəziyyətləri yaradırdıq. Amma onları dəyərləndirə bilmədik. Əvəzində öz qapımızda qollar gördük. İkinci hissədə isə istəyimizə nail ola bildik və hesabı bərabərləşdirdik.
- Demək olar ki, qeydə alınan heç-heçədən razı qaldınız?
- Nəzərə alsaq ki, oyunun gedişində uduzurduq, buna görə bu nəticədən razı qalmaq olar. Hər halda məğlubiyyətlə müqayisədə heç-heçə 1 xal qazandırır.
- Amma bu heç-heçə daha çox “Neftçi” üçün göydəndüşmə oldu və onlar çempionluğunu baydam etdi...
- Mən bunu onlar üçün hədiyyə hesab etmirəm. Biz “Neftçi” üçün oynamırdıq. Komandamız meydana qələbə üçün çıxsa da, heç-heçəyə razılaşmalı olduq. Amma burda heç nə etmək olmaz.
- 30-cu turda “Qarabağ”ı “Xəzər Lənkəran”la çətin oyun gözləyir. Amma onları “Bakı” ilə çətin kubok dueli gözləyir və yəqin ki, yorğun olacaqlar...
- Düşünmürəm ki, bu amil bizim üçün ciddi üstünlük yaratsın. Bizim XL-la oyunlarımız həmişə maraqlı və gərgin alınıb. Bu dəfə də istisna olmayacaq.
