2 may 2011 12:18
Rail Məlikov: Bu çempionluğu bizim qədər heç kim arzulamırdı
“Neftçi”nin kapitanı Rail Məlikov azerisport.az saytına müsahibəsində qazandıqları çempionluqdan və zədəsindən danışıb.
- 6 illik fasilədən sonra “Neftçi” yenidən çempion oldu. Onda bu komandada oynamasaz da, indi “ağ-qaralar”ın kapitanısız. Təəssüratlarınız necədi?
- Çox müsbət. Biz bu mövsümə çox yaxşı başladıq və öz məqsədimizə çatmaq üçün sona kimi çalışdıq. Təsadüfi deyil ki, çempionluğumuzu da sona 3 tur qalmış təmin etdik. Bu da onu göstərir ki, yəqin bu çempionluğu bizim qədər heç kim arzulamırdı.
- Siz düşünürsüz ki, digərləri çempion olmaq istəmirdi?
- Biz bu turnirin qalibi olmuşuqsa, deməli, bizdən çox bunu arzulayan yox imiş. Bu çempionluğu daim bizim yanımızda olan azarkeşlərimizə və “Neftçi”ni ölkənin ən güclüsü etmək istəyən klub prezidenti Sadıq Sadıqova həsr edirik.
- Çempionluğu məhz bu turda qeyd etməyə hazırlıqlı görünürdüz...
- Çempionluq sevincimizi növbəti turlara saxlamaq istəmirdik. Təəssüf ki, meydanda sona kimi qala bilmədim. Amma bu, heç nəyi dəyişmədi. Ən önəmlisi odu ki, qızıl medalları özümüz üçün təmin etdik.
- “Qarabağ” – “Bakı” oyununa baxa bildiniz? Hansı ki, qeydə alınan həmin 2:2hesabı sizin çempionluğunuza zəmin yaratdı.
- 80-ci dəqiqəsinə kimi baxdım. Ardından isə öz oyunumuza görə Şüvəlana getməyə borclu idik. Əlbəttə ki, oyuna çıxanda artıq ağdamlıların xal itirdiyini bilirdik. Bundan sonra bizə sadəcə AZAL-a qalib gəlmək qalırdı ki, buna da nail olduq.
- Bu mövsüm çoxları iddia edir ki, “Neftçi”yə hakimlər çox kömək etdi. Bu fikirlər sizi məyus etmir ki?
- Bunlar hamısı boş-boş söhbətlərdi. Biz hər şeyə öz gücümüzlə nail olduq və Azərbaycan çempionu adını qazandıq. Bizim oyunumuz da bunun göstəricisidi.
- Zədəniz nə yerdədi?
- Ümid edirəm ki, ciddi heç nə yoxdu. Gördüyünüz kimi, hər şey qaydasındadı.
