3 may 2011 18:36
Sadıq Sadıqov: Onlar Neftçi`nin qələbəsini qəbul etməlidilər
“Neftçi”nin prezidenti Sadıq Sadıqov Azərbaycan çempionu olmaqla vəsiqə qazandıqları UEFA Çempionlar Liqasında qarşılarına qoyduqları vəzifələri açıqlayıb. Azerisport.az saytına müsahibəsində bunları dilə gətirib:
“Bizim çempionluğumuz hələlik ilk addım idi. Biz, əlbəttə, klubumuzun bu qələbəsindən çox şadıq. Amma bizi qarşıda Çempionlar Liqasında da uğurlu çıxış gözləyir. Başa düşürəm ki, komandam üçün çətin olacaq. Ancaq “Neftçi” uğurlu çıxış etməyə borcludu. Oyunçular da belə hesab edir ki, komanda minimum iki mərhələ keçməlidi”.
“Ağ-qaralar”ın prezidenti iki gün öncə rəsmiləşdirdikləri çempionluğun böyük məsuliyyət olduğunu dilə gətirib: “Neftçi” xalq komandasıdı, neftçilərin komandasıdı. Əgər biz onları sevindirə bildiksə, deməli öz işimizi düzgün qurmuşuq. Bu qələbəmizdə təkcə oyunçuların, məşqçilərin yox, həm də sizlərin xidməti böyükdü. Siz jurnalistlər futbolumuzun, klublarımızın inkişafına çox kömək edirsiz. Həmçinin bizim baş sponsorumuzu da xüsusi qeyd etmək istərdim”.
Sadıqov bu mövsümük rəqabətdən də danışıb: “Bu mövsümkü çempionat çox maraqlı mübarizə şəraitində keçdi. Hətta “Neftçi”nin 3 tur öncədən çempion olması da intriqanın olmamasından xəbər vermir. Maraqlı mövsüm idi. Hansı ki, “Xəzər Lənkəran”, “Qarabağ”, “İnter”, AZAL və “Bakı” da çempion ola bilərdi. Bizim bəxtimiz gətirdi”.
“Fikrimcə, qazandığımız xallar, qələbələr, vurduğumuz qollar “Neftçi”nin əsl gücünün göstəricisidi. Mən neçə ildi idmandayam və bunun nə demək olduğunu gözəl bilirəm. Son bir ildə də uduzanları yaxşıca tanımağa başlamışam. Ona görə də onlardan danışmaq istəmirəm. Onlar “Neftçi”nin qələbəsini qəbul etməlidilər” – deyə, Sadıqov tənqidçilərin və rəqiblərinin də cavabını verib.
