4 may 2011 15:26
Georgi Adamiya: Kubokun finalında XL-la İnter qarşılaşacaq
“Qarabağ”ın yarımmüdafiəçisi Georgi Adamiya Azərbaycan kubokunun cavab yarımfinal oyunları öncəsi iştirakçı komandaların şanslarını dəyərləndirib. Azerisport.az saytına müsahibəsində o, öncə “Bakı”yla Premyer Liqanın 29-cu turunun oyununu (2:2) şərh edib:
“Birinci hissədə hücum qurmaqda müəyyən qədər çətinlik çəkirdik. Amma “Bakı” ilk 45 dəqiqədə öz şanslarından yararlana və bizə iki qol vura bilmişdi. Buna baxmayaraq, hesab edirəm ki, ikinci hissədə biz daha yaxşı oynadığımızı sübut etdik”.
Adamiyanın sözlərinə görə, rəqibin sıx qrafiklə oynaması oyunlarına qətiyyən təsir göstərmir? “Onların ehtiyat oyunçular skamyası kifayət qədər uzundu. Demək olar ki, hər mövqeyə iki layiqli namizədləri var. Yəni hardasa, iki bərabərsəviyyəli heyətə malikdi. Bir sözlə, onların heyəti çox güclüdü. Onlar sıx qrafiklə oynasalar da, bizə qalib də gələ bilərdilər. Amma biz məğlubiyyətdən qaça bildik”.
Gürcü yarımmüdafiəçi ölkə kubokunun yarımfinal cütlükləri ilə bağlı bunları dilə gətirib: “Bakı” kimi, onun rəqibi “Xəzər Lənkəran”ın da oyun qrafiki çox çətindi. Amma mən bilmirəm onlardan hansı yorğun olacaq. Hər halda oyun hər şeyi göstərəcək. İndi sadəcə bu oyunun çox çətin keçəcəyini demək olar”.
Adamiyanın finalçılarla bağlı proqnozu isə belədi: “Əlbəttə, kimin finala çıxacağını indidən deyə bilmərəm. Sadəcə, mən belə hesab edirəm ki, finalda XL-la “İnter” qarşılaşacaq”.
