5 may 2011 17:15
Neftçi və XL arasında yeni qalmaqal
“Neftçi” və “Xəzər Lənkəran” klubları arasında yeni qalmaqal yaranıb. Azerisport.az xəbər verir ki, buna cənub klubunun icraçı direktoru, eləcə də Lənkəran stadionunun direktoru Höccət Hacıyevin verdiyi açıqlama səbəb olub.
O, bugünkü açıqlamasında bildirib ki, “Xəzər Lənkəran” Premyer Liqanın qalibi olan “Neftçi”ni yox, klubun prezidenti Sadıq Sadıqovu təbrik edəcək. Hacıyev niyə məhz əzəli rəqiblərinin prezidentini təbrik eləmələrinin səbəbini belə izah edib: “Neftçi”nin kapitanı Rail Məlikov bildirib ki, bu, Sadıq Sadıqovun qələbəsidi. Ona görə də biz məhz Sadıqovu təbrik edəcəyik”.
“Neftçi”nin Mətbuat və İctimaiyyətlə Əlaqələr Departamentinin rəhbəri Elnur Əşrəfoğlu isə ona cavab olaraq bunları dilə gətirib: “Komandamızın çempionluğu münasibətilə çox nüfuzlu klubların və şəxslərin adından təbrik məktubları daxil olur. Onların arasında “Milan” kimi nəhəng klubun vitse-prezidenti Adriano Qalliani və digərləri də var. Buna görə də onlara təşəkkür edirik. O ki qaldı Höccət müəllimin bu açıqlamasına, bildiyiniz kimi, o Lənkəran stadionunun direktorudu. Buna görə də yaxşı olardı ki, Höccət Hacıyev Sadıq Sadıqovu yox, “Neftçi” Peşəkar Futbol Klubunun tabeçiliyində olan İsmət Qayıbov adına Bakıxanov qəsəbəsi stadionunun direktoru Mamed müəllimi təbrik etsin”.
