6 may 2011 11:23
Turan Naci Şensoyu yenə qovdu
“Turan” rəhbərliyi baş məşqçi Naci Şensoyla yollarını ayırmağa qərar verib. Azerisport.az xəbər verir ki, türkiyəli mütəxəssisin Tovuz klubundan uzaqlaşdırılmasına onun komandasının uğursuz nəticələri, eləcə də Şensoyun aqressiv çıxışları, hərəkətləri səbəb olub.
Qeyd edək ki, az qala hər oyundan sonra AFFA və PFL-i, hakimliyi tənqid edən bu mütəxəssis yaxınlarda 5 oyunluq cəzaya layiq görülmüşdü və mövsümün sonuna kimi komandanı meydana çıxara bilməyəcəkdi. Lakin “Turan” rəhbərliyi heç onun cəzasını gözləmədən vaxtından öncə istefa göndərməyə qərar verib.
Maraq üçün xatırladaq ki, bu, tovuzluların düşərgəsində cari mövsümkü üçüncü baş məşqçi istefasıdı. Öncə Sakit Alıyevi Revaz Dzodzuaşvili ilə əvəzləyən bölgə təmsilçisi sonradan Naci Şensoyla anlaşmışdı. Üçüncü dəfə “Turan”ı çalışdıran türkiyəli çalışdırıcı yenə eyni uğursuzluqla üzləşmiş oldu.
