6 may 2011 11:46
Vladimir Levin: Ən pis halda dördüncü olub, özümüzü sığortalamalıyıq
“İnter”in kapitanı, millimizin müdafiəçisi Vladimir Levin azerisport.az saytına müsahibəsində AZAL ilə ölkə kubokunun cavab matçından, bürünc mükafat uğrunda mübarizədən və çempionatın gedişindən danışıb.
- Ölkə kubokunun finalına vəsiqə qazandığınıza görə sizi təbrik edirik!
- Çox sağ olun. Çox şadam ki, qələbə qazandıq, finala adladıq. Biz bu qələbəni artıq iki ay idi gözləyirdik. İndi sadəcə kuboku qazanmaq qalır.
- Komandanızın bu oyundakı son dəqiqələrdəki çıxışını necə qiymətləndirirsiz? Axı rəqib komandanın qol vurmaq üçün bir neçə şansı oldu...
- Artıq demək olar ki, onlar elə d vacib deyil. 1:0 qələbə qazanmışıq, vəssalam. Bəli, əlbəttə, çox təəssüf ki, bəzi qol vəziyyətlərimizdən də istifadə edə bilmədik. Çox qol vura bilərdik. Amma ən əsası odu ki, qələbə sayəsində finala qədər irəliləyə bildik.
- Finaldakı rəqibiniz “Xəzər Lənkəran”dı...
- Fikrimcə bu, çox maraqlı final olacaq. Lənkəranlılarla “altılıq”dakı son oyunumuz azarkeşlər üçün çox maraqlı alınmışdı. Ümumiyyətlə, finalda güclü olan qazanır. Hər halda bizi çox çətin, amma baxımlı bir final gözləyir.
- “İnter”in iki həftəyə 4 oyun keçirməsi komandanın oyununa təsir edib?
- Düşünmürəm ki, bu yöndə hansısa problem var. Hər şey normaldı. Bunu həm ilk dəqiqələrdən, həm də sonradan meydana çıxanlara aid etmək olar. Əgər yorğunluq olsaydı, bu, hiss olunardı.
- Artıq ardıcıl iki oyundu (“Neftçi” və “İnter”lə) ki, AZAL-ın yeni stadionunda həm meydan sahiblərinin, həm də qonaqların futbolçuları ciddi zədə alır...
- Bəli, şübhəsiz süni qazonda oynayırsansa zədə almaq ehtimalı da artır. Baxmayaraq ki, elə bizim oynadığımız “Şəfa” stadionunun da qazonu sünidi. Amma məncə, AZAL-ın stadionunda olanlar sadəcə təsadüfdü. Ümid edirəm ki, bundan sonrakı oyunlarda artıq eyni hallar təkrarlanmayacaq.
- Finala çıxsaz da, hələ avrokuboklara vəsiqəni rəsmiləşdirə bilməmisiz. Gözləmək olar ki, son üç turda həm də bürünc medal uğrunda mübarizə aparacaqsız?
- Əlbəttə. Biz ən pis halda dördüncü pilləni tutmaqla özümüzü sığortalamağa çalışmalıyıq. Axı ola bilər ki, kuboku qazana bilməyək. Buna görə biz AZAL-ı qabaqlamalıyıq ki, kubokda uduzsaq da belə, dördüncü yeri tutmaqla avrokuboklara yollana bilək.
