8 may 2011 14:38
Qızına görə baş məşqçi postundan ayrıldı
“Beşiktaş”ın sabiq baş məşqçisi kimi tanıdığımız Jan Tiqana yenidən işsiz qalıb. Azerisport.az xəbər verir ki, o, dünən keçirilən Fransa çempionatının 34-cü turunun oyunundan sonra “Bordeaux”dakı vəzifəsindən ayrıldığını bildirib.
Buna onun doğma meydanda “Sochaux” ilə qarşılaşmada üzləşdiyi ağır məğlubiyyət səbəb olub. Belə ki, “Bordeaux” bu görüşdə 4 cavabsız qolla məğlub olub.
Qeyd edək ki, bu komandada böyük təzyiqlərlə üzləşdiyini hələ bir müddət öncə də dilə gətirən Tiqana istefa vermək istəsə də, rəhbərlik qəbul etməmişdi. Lakin bu dəfə artıq vəziyyətin dözülməz həddə çatdığını deyən mütəxəssis istefasının səbəblərindən danışarkən bunları söyləyib:
“Həm mənim, həm də klub üçün bərbad bir gündü. Qızıma tribunada sözlü təzyiqlər, təcavüzlər oldu. Onun məktəbində də problemləri var. Bu üzdən mən də qərarımı verməli oldum”.
Qeyd edək ki, Tiqana “Bordeaux”nun sükanı arxasına bu mövsüm keçmişdi.
