9 may 2011 11:35
Aleksandr Şoliç: Onunla meydanda birgə olmaq zövq verir
“Bakı”nın yarımmüdafiəçisi Aleksandr Şoliç azerisport.az saytına Premyer Liqanın 30-cu turunun AZAL-la oyununda “altılıq” çərçivəsində qazanılan ilk qələbələrindən danışıb (2:0).
- “Altılıq”dakı ilk qələbənizə görə təbrik edirik. Oyun haqda nə deyə bilərdiz?
- Təbrikinizə görə sağ olun. Çətin oyun alındı. Rəqib hesabı bərabərləşdirəndə düşündüm ki, yenə qələbəni əldən verəcəyik. Amma yaxşı ki, sonda qələbə qazana bildik. Bu, bizim “altılıq”dakı ilk qələbəmiz idi. Bu qələbə bizə psixoloji planda çox kömək edəcək. Ümid edirəm ki, qalan oyunlarda da qələbə qazanacağıq.
- Cərimə zərbəsindən çox hiyləgər bir qol vurdunuz. Qapıçının bağladığı zonanı nişan almaqla qol vuracağınızı gözləyirdiniz?
- Düzünü deyim ki, o vəziyyətdə heç mən özüm də gözləmirdim ki, top qapıya daxil olacaq. Amma əlbəttə ki, qol vurmağı çox istəyirdim. Sadəcə, belə şeylər təsadüfi hallarda baş tutur. Hər halda belə qol vurduğum üçün çox sevincliyəm.
- Qol vurduqdan sonra birinci hissədə komandanızın oyunu da yaxşılığa doğru dəyişdi...
- Qola qədər də pis oynamamışdıq. 1:0-dan sonra isə bir qədər də ürəkləndik. Amma siz də bilirsiz ki, bu, çox sürüşkən hesabdı, demək olar ki, 0:0 kimi bir şeydi. Buna görə də, ikinci qol üçün axtarışa çıxdıq. Amma həmin qolu yalnız ikinci hissədə vurduq.
- İkinci hissəyə pis başlamağınız nə ilə bağlı idi?
- Bəli, ikinci hissənin əvvəlində oyunumuz alınmırdı. Nəticədə qol da buraxdıq. Mümkündü ki, hava şəraiti də müəyyən təsirini göstərdi. Amma komandamız sona kimi öz oyununu oynamağı bacardı. Hücumlarımızı davam etdirdik ki, nəticədə də qələbə qolunu vura bildik. Bütövlükdə, hesab edirəm ki, komandamız yaxşı oynadı.
- “Bakı” meydana iki pleymeykerlə çıxmışdı: siz və Mahmud Qurbanov. Bu, hansısa çətinlik yaratmırdı ki?
- Heç bir çətinlik, problemdən söhnət gedə bilməz. Əksinə, oyunumuz daha yaxşı alınırdı. Mahmud əla oyunçudu və onunla meydanda birgə olmaq da zövq verir.
- Heç bir önəmi qalmayan oyunlara köklənmək çətin deyil ki?
- Xeyr. Şəxsən mənim üçün hər oyun vacibdi. Buna görə də motivasiya baxımından problem görmürəm. Komandanın bütün oyunçuları peşəkardılar. Heç birimiz burda müftə oynamırıq, müəyyən maaş alırıq. Buna görə də komandanın imici naminə qələbə qazanmağa borcluyuq.
