10 may 2011 16:18
“Düşmən bizdən cəmi 200 metr aralıdadı”
Azərbaycan futbolunun canlı əfsanələrindən biri, 1975-1979-cu illərdə "Neftçi"nin şərəfini qorumuş Elbrus Abbasov Premyer Liqanın 31-cu turunun "Qarabağ" – "Neftçi" oyununun Quzanlıda keçirilməsi haqqında fikirlərini saytına bildirib. Azerisport.az xəbər verir ki, o, paytaxt klubunun rəsmi saytına açıqlamasında bunları dilə gətirib:
"Quzanlıda futbol bayramlarının keçirilməsi təkcə mənim yox, bütün Qarabağ camaatının istəyidi. Həmişə rayon əhalisi ilə görüş zamanı onlar "Qarabağ"ın oyunlarını canlı izləmək istədiklərini bildirirdilər. Düşünürəm ki, başı bəlalar çəkmiş Qarabağ camaatına bundan böyük hədiyyə ola bilməz. Bizim səsimizə səs verən, Azərbaycan futbolunun flaqmanı "Neftçi" oldu. Başda klub prezidenti Sadıq Sadıqov olmaqla "Neftçi" klubuna dərin minnətdarlığımı bildirirəm. Quzanlıda oynamaq ideyası ortaya çıxan kimi "Neftçi"nin prezidenti Sadıq Sadıqov dərhal buna razılıq verdi. Bu, hər kəsə örnək olmalıdı. Bir daha "Nefçi"ni bu addımına və vaxtından əvvəl çempion olduğuna görə təbrik edirəm. Onlara və digər klublarımıza Avropa arenasında uğurlar arzulayıram.
Qarabağda futbolu çox sevirlər, orada futbol üçün darıxıblar. Ağdamda oynamaq hər cəhətdən vacibdi. "Qarabağ" ev oyunlarını burada keçirəndə Quzanlı Olimpiya İdman Kompleksinin tribunaları dolu olur. Əhali doğma klubunun oyununu izləmək üçün rayonun hər yerindən bura axışır. Bu həm də siyasi bir məsələdi. Düşmən bizdən cəmi 200 metr aralıdadı. Orada güllə səsləri eşidilir. Biz isə burada futbol oynayırıq. Qarabağı "Qarabağ"sız qoymaq olmaz. Quzanlı stadionunun öt örtüyü ideal vəziyyətdədi. İdman Kompleksində hər cür şərait yaradılıb. Komandaların bura gəlməsində heç bir problem yaşana bilməz. Mən özüm artıq bir müddətdi ki, Ağdamda yaşayıram. Burada çox istedadlı uşaqlar var. Hazırda onları bir yerə toplayıb məşq keçirəm. İnşallah, gələcəkdə onların içindən layiqli futbolçular çıxacaq".
