12 may 2011 01:42
İtaliya kubokunun finalçıları müəyyənləşdi (YENİLƏNİB)
İtaliya kubokunda yarımfinal mərhələsinin cavab oyunları keçirilib. Azerisport.az xəbər verir ki, ilk oyun günündə bir cavab qarşılaşması baş tutub.
Ötən həftə İtaliya çempionu adını qazanan “Milan” səfərdə “Palermo” ilə qarşılaşıb. Milanda keçirilən ilk oyunda bir qədər sürpriz şəkildə 2:2 hesablı heç-heçəyə imza atan “Palermo” iddiasını elə həmin gün ortaya qoymuşdu. Cavab matçında da 10 dəqiqəyə iki qol vuran bu komanda “Milan”a sadəcə təsəlli qolu imkanı yaradıb. Nəticədə ilk finalçı nə qədər gözlənilməz olsa da, məhz “Palermo” olub.
İkinci oyun günündə isə son illərin ən prinsipial rəqibləri - “Roma” ilə “İnter” qarşılaşıb. Romada keçirilən ilk qarşılaşmada paytaxt təmsilçisi minimal hesabla məğlub olmuşdu. Bu üzdən cavab oyunu ərəfəsində Milanın dirər təmsilçisi daha şanslı hesab olunurdu. Doğma meydanda keçirilən qarşılaşmada qollu heç-heçə qeydə alındığından, finala da məhz bu komanda adlayıb.
İtaliya kuboku
Yarımfinal
Cavab oyunları
10 may
Palermo – Milan – 2:1
Qollar: Miqliaççio, 63, Bovo, 73-pen – İbrahimoviç, 90.
İlk oyun – 2:2
11 may
Inter - Roma - 1:1
Qollar: Eto´o, 58 - Borryello, 84.
İlk oyun – 1:0
