11 may 2011 11:52
“Qəbələ`də 2-3 oyunçu gedəcək, 3-4 yeni səviyyəli legioner gələcək”
“Qəbələ”nin müdafiəçisi Saşa Yunisoğlu azerisport.az saytına komandasının yeni transferlərindən danışıb, turnir cədvəlindəki durumlarını müzakirə edib.
- Hazırkı klubunuzla yeni müqavilə bağlamağınıza başqa komandalardan dəvət olmaması səbəb oldu?
- Mənə elə gəlir ki, daha bir il Qəbələdə çıxış etmək mənə mane olmaz. Əlbəttə, başqa təkliflər də var idi. Amma o dərəcədə ciddi təkliflər deyildi ki, onlara baxam. Mənim üçün burda hər şey yaxşıdı.
- Heç ölkə xaricinə də çıxmağı arzulamırsız?
- Əgər ciddi dəvətlər olarsa, o zaman yenidən legioner həyatı yaşamağa hazıram. Polşada çıxış edərkən mən çox müsbət şeylər gördüm. “Qəbələ” ilə müqavilə bağlayarkən Toni Adamsla söhbətim oldu. O, mənim xidmətimdə maraqlı olduğunu və daha bir il qalmağımı xahiş etdi. İstəyirəm ki, infrastrukturun yaxşılaşmasının şahidi olum. Artıq 3 sintetik meydança hazırdı. Hazırda oynadığımız meydança yenidən qurulacaq. Növbəti mövsümdən artıq təbii qazonda oynamış olacağıq. Oyunların gecə keçirilməsi üçün yeni projektorlar gətirilir və tribunalar genişləndirilir. Tezliklə, burda hər şey daha yaxşı olacaq.
- Maliyyə şərtləri də yaxşılaşıb?
- Hazırda burda məni hər şey qane edir. Deməli, bu planda da hər şey yolundadı. Mən peşəkar futbolçuyam və buna görə xüsusi narahatlıq keçirmirəm.
- Komandanız Mahir Şükürovun ardınca daha bir milli üzvü Vurğun Hüseynovu da heyətinə qatdı...
- Vurğun gənc, perspektivli futbolçudu. Yaxşı rəqabət yaradacağına inanıram. Mahir də komandaya yaxşı uyğunlaşdı. Ölkənin ən yaxşı sağ cinah müdafiəçilərindən biridi. Onu Rail Məlikovdan zəif hesab etmirəm. Amma bu, komandamızın son transferi deyil. Toni Adams öz yetirmələrinə heç vaxt əsəbləşmir. Hər bir futbolçuya oynamaq, özünü təsdiqləmək imkanı yaradır.
- “Turan” üzərində qələbə qazansaz da, artıq hiss olunur ki, sadəcə mövsümün başa çatmasını gözləyirsiz...
- Elədi ki, var. Bizim artıq heç bir ciddi məqsədimiz qalmayıb. Çünki ikinci altılıqda mübarizə aparırıq. Bu oyunlara köklənmək çox çətindi. Məşqçilər korpusu da artıq gələcəyi düşünür. Mən eşitmişəm ki, 2-3 futbolçu dəqiq gedəcək. Əvəzində 3-4 səviyyəli legioner gələsidi.
- 7-ci pilləni “Muğan”a təhvil verməkdən qorxmursuz ki? Yoxsa bu, sizin üçün elə də prinsipial deyil?
- Bunun heç bir prinsipial anlamı yoxdu. Amma hər ehtimala qarşı 7-ci pillədəki mövqeyimizi qoruyub saxlamaq lazımdı ki, həqiqətən də mövsümü yola verdiyimizi deməsinlər.
