12 may 2011 16:14
Əfran İsmayılov: Elvin Məmmədov tələsdi
“Qarabağ”ın yarımmüdafiəçisi Əfran İsmayılov azerisport.az saytına müsahibəsində Premyer Liqanın 31-ci turunun “Neftçi” ilə Quzanlıda keçiriləcək oyunundan və Elvin Məmmədovun komandadan gedişindən danışıb.
- “Neftçi” ilə oyuna necə hazırlaşmısız?
- Ağdama yenicə çatmışıq. Hazırda bütün diqqətimiz məhz “Neftçi” ilə keçirəcəyimiz bu oyuna yönəlib. Şübhəsiz ki, bu oyun bizim üçün vacib əhəmiyyət daşıyır və mütləq 3 xal qazanmalıyıq. İkinci yeri tutmaq üçün bu matçın Quzanlıda keçirilməsi də bizə əlavə stimul verir.
- Sizin və komandanız üçün Quzanlıda oynamaq nə deməkdi?
- Bu, bizim üçün böyük məna daşıyır. Ən azı ona görə ki, bu, bizim doğma arenamızdı, ağdamlı azarkeşlər önündə oynayacağıq. Buna görə də qələbə qazanmağa borcluyuq. Sabahkı oyunda əlimizdən gələn hər şeyi edəcəyik ki, qələbə qazanaq, azarkeşlərimizi sevindirək.
- Bu, bizim üçün böyük məna daşıyır. Ən azı ona görə ki, bu, bizim doğma arenamızdı, ağdamlı azarkeşlər önündə oynayacağıq. Buna görə də qələbə qazanmağa borcluyuq. Sabahkı oyunda əlimizdən gələn hər şeyi edəcəyik ki, qələbə qazanaq, azarkeşlərimizi sevindirək.
- “İnter”lə son oyuna “Neftçi” demək olar ki, əvəzedici heyətlə çıxsa da, rəqibinə uduzmadı...
- Bu, təəccüblü deyil. Təbii ki, ehtiyatda qalan futbolçular şans qazananda ikiqat gücünü meydanda qoyur ki, özünü sübut etsin. Bizimlə oyunda da elə olacağını düşünürəm. Amma onların ikinci heyətinin meydana çıxması bizim işimizi asanlaşdırmayacaq.
- “Xəzər Lənkəran”la son oyununuzda birinci və ikinci hissədə sərgilədiyiniz futbol tam fərqləndi. Pis başlasaz da, sonunda sevinə bildiniz...
- Bu komandaya qarşı oynamaq həmişə çətin olub. Düzdü, birinci hissədə bizim oyunumuz elə də alınmırdı. Burda təbii ki, rəqibin yaxşı oynamasının da rolu az olmadı. Məhz buna görə də biz hazırda ikinci yer uğrunda uğrunda mübarizə aparırıq.
- Sizin üçün gümüş medalları qazanmaq nə dərəcədə vacibdi? Axı avrokuboklara vəsiqəni təmin etmisiz...
- Düzdü, ikinci və ya üçüncü yeri tutmağımızın o qədər də ciddi fərqi yoxdu. Amma biz istənilən halda mübarizəmizi sona kimi davam etdirməli və ikinci yeri tutmalıyıq. Bu mövsüm ikinci yeri tutsaq, gələn il də çempion olarıq. Hər halda addım-addım yüksəlmək, irəliləmək lazımdı.
- Elvin Məmmədovun “Qarabağ”dan getməsi komandaya təsir etməyib ki?
- Əlbəttə, istəməzdik ki, o, komandadan getsin. Elvin yaxşı oyunçudu. Amma hesab etmirəm ki, onun gedişi komandaya güclü təsir göstərsin. Onun hələ klubumuzla müqaviləsi başa çatmasa da, artıq bizimlə birgə meydana çıxmayacaq. Hər şeyin belə qısa müddətdə baş verməsini təsəvvür etmək çətindi. Sadəcə bizimlə məşqlərini davam etdirəcək. Hər halda ona “Bakı”da uğurlar arzulayıram. Avrokuboklarda iştirak etmək baxımından onun tələsdiyini deyərdim. Amma yenə qərar onundu.
- Vüqar Nadirovun da komandadan getməsi gözlənilir...
- Vüqar özü deyib ki, “Qarabağ”da qalacaq. Buna görə də onun komandadan gedəcəyini düşünmürəm.
