12 may 2011 20:38
Millimiz Rumıniya ilə oyundan sülhlə ayrıldı (YENİLƏNİB)
Moldovanın Kişinyov şəhərində təşkil olunmuş “FA of Moldova Cup” turnirində çıxış edən 17 yaşadək futbolçulardan ibarət Azərbaycan yığması bu gün ikinci oyununu keçirib. Azerisport.az xəbər verir ki, futbolçularımız bu dəfə rumıniyalı həmyaşıdları ilə qarşılaşıb.
Qeyd edək ki, Təbriz Həsənovun komandası bu görüşə lider kimi çıxırdı. Çünki ilk oyunda komandamız Litva millisi üzərində qazandığı əzmkar qələbə (2:1) sayəsində iştirakçılar arasında birinci pilləyə yüksəlmişdi. Turnirə ev sahibliyi edən Moldova isə məhz bugünkü rəqibimiz Rumıniyanı 1:0 hesabı ilə məğlub etmişdi.
Tərəflərin çoxsaylı cəhdlərinə rəğmən, qapılara qol vuran tapılmayıb. Komandamız isə ikinci hissəni demək olar ki, bütövlükdə 10 nəfərlə keçirib. Lakin heç-heçəyə rəğmən, komandamız liderliyini qoruyub.
FA of Moldova Cup
12 may
AZƏRBAYCAN – RUMINİYA - 0:0 (0:0)
Oyun başladı
Komandamız oyuna daha fəal başlayıb
Təbriz Həsənovun yetirmələri topa daha çox nəzarət edir, daha təhlükəli hücumlar qurur
Hissənin ortalarına yaxınlaşdıqca rumınlar oyunda bir qədər dönüş yarada biliblər və onlar da artıq bir neçə təhlükəli hücum təşkil edib
Millimizin ardıcıl iki dəfə qol vurmaq şansı olsa da, oyunçularımız son anda dəqiq oynamırlar
İlk yarının sonlarında rumınların heyətində iki əvəzləməyə əl atılır
Birinci hissə qolsuz başa çatır
İkinci hissə başladı
Komandamız ikinci hissədə də fəal görünür
49-cu dəqiqədə komandamızın oyunçularından biri topsuz rəqibinə zərbə endirdiyi üçün meydandan qovulur
Komandamızın heyətində Qurbanəli Əliyevi Nurlan Əhmədov əvəzləyir
Millimiz azlıqda qalsa da, hücumlarını davam etdirir
Rumınlar getdikcə üstünlüyü ələ almağa başlayıblar və qapımız qarşısında təhlükəli vəziyyətlər yaradırlar
Komandamızın qapıçısı son saniyələrdə inanılmaz şəkildə rəqibin fərqlənməsinə imkan vermir
Matç başa çatdı
Bu oyunla eyni vaxtda keçirilən oyunda isə meydan sahibləri Moldova Litva ilə qarşılaşıb. İlk yarının son dəqiqəsində moldovalılar hesabda önə keçsələr də, 70-ci dəqiqədə litvalılar hesabı bərabərləşdiriblər - 1:1. Bu azmış kimi, qonaq komanda son saniyələrdə qələbə qoluna da imza atıb - 1:2.
