13 may 2011 00:14
“Şadam ki, bunu görmək mənə nəsib oldu”
Premyer Liqanın 27-ci turu "Qəbələ"nin 25 yaşlı qapıçısı Anar Nəzirov üçün əlamətdar oldu. Belə ki, o, bu mövsümdə ilk dəfə "Qəbələ"nin əsas heyətində Premyer Liqa oyununda meydana çıxmaq şansı əldə etdi.
Azerisport.az xəbər verir ki, karyerası ərzində "Gəncə", "Turan", "Standard" və "Neftçi"də oynayan qapıçı son iki turda "Qəbələ"nin qapısının toxunulmazlığını öz üzərinə götürüb. "Qəbələ" - "Simurq" oyununda (3:0) qazanılan qələbədə payı olan Anar son 4 turda da qapıda etibarlı dayandı.
Futbolçu əsas heyətdəki ilk oyunu, əsas qapıçı Pavel Doroşev və növbəti mövsüm barədə danışıb.
- "Simurq"la oyun sənin üçün əlamətdar oldu...
- Çox sag olsun baş məşqçimiz, mənə bu şansı verdi. Çox istəyirdim ki, özümü yaxşı tərəfdən göstərim və onun ümidlərini doğruldum. Məncə, birinci dəfə üçün pis alınmadı.
- Bu, bir tərəfdən də, rəmzi olsa belə, "quru seriya"nın başlanğıcı oldu.
- Bəli, belə də demək olar. Ümümiyyətlə, birinci oyunda gol buraxmadığıma görə çox xoşbəxtəm. Çünki bu, özünəinam hissinin olması baxımından, hər bir qapıçı üçün çox vacibdi. Çalışacağam ki, mövsümün axırınadək qapımın toxunulmazlığını qoruyub saxlayım. Amma əsas odu ki, "Qəbələ" qələbə qazansın. Şadam ki, çıxdığım ilk oyunda bunu görmək mənə nəsib oldu. Bu qələbədə mənim də payım olduğuna görə çox sevinirəm.
- Yəqin ki, bundan sonra baş məşqçi Toni Adamsın sənə daha çox şans verəcəyini gözləyirsən?
- Əlbəttə. Hər bir oyunçu vaxtının böyük hissəsini meydanda keçirmək istəyir. Amma gərək, bunu baş məşqçi də istəsin. Mənim vəzifəm məşqlərdə can yandırmaq və hər an oyuna hazır olmaqdı.
- Pavel Doroşevslə rəqabət aparmaq sənin üçün çox çətindi?
- Paşa (Pavel Doroşev-red.) bu mövsümdə çox etibarlı oynadı. 11 matçda qapısını toxunulmaz saxlamağı nəyə desən dəyər. Təbii ki, belə bir qapıçıyla rəqabət aparmaq çox çətindi.
- Belədisə, onda onu özün üçün yaxşı təcrübə mənbəyi hesab edirsən?
- Bəli. Paşa soyuqqanlı qapıçıdı. Bu, əlcək sahibləri üçün çox vacib keyfiyyətdi. Onunla birgə məşq etməyin özü, deyərdim ki, böyük məktəbdi. Ondan çox şey öyrənirəm.
- 30 nömrə altında meydana çıxırsan. Bu rəqəmin sizin üçün bizim bilmədiyimiz başqa bir mənası da var?
- (Gülür) Heç bir mənası yoxdu. Sadəcə, 1 nömrəli forma Elnar Kərimovda, 12 isə Paşadadı. Bircə 30 nömrə qalmışdı, onu da mən götürdüm.
- Bu mövsümü komanda üçün uğursuz saymaq olar?
- Məncə, yox. Təbii ki, ilk "altılığ"a düşə bilməməyimiz mənfi haldı. Lakin yeni qurulan komanda olduğumuza görə bunu normal qarşılamaq lazımdı. Məşqçilər heyəti də yenidi, futbolçular da. Bu qədər dəyişiklik komandaya təsirsiz ötüşməyə bilməzdi.
- Növbəti mövsümdən nə gözləyirsən?
- Ən azı, bundan yaxşı nəticə. Bu mövsümdən fərqli olaraq, gələn il güclülərlə bir sırada olmağı və təbii ki, komandamın avrokuboklarda oynamasını istəyirəm. "Qəbələ"nin azarkeşləri bunu çox arzulayır.
- Səncə, bunun üçün hansı addımlar atılmalıdı?
- Məncə, heyət gücləndirilməlidi. İlk addım artıq atılıb - Mahir Şükürov komandamıza transfer edilib. Eşitdiyimə görə, bu, hələ son deyil, yeni transferlər də olmalıdı. "Qəbələ"də rəqabət daha da güclənərsə, bu, hamı üçün faydalı olacaq. (Qəbələ FK)
