14 may 2011 13:15
Qarabağ`da 5 illik həsrətə son
“Qarabağ” cari mövsümdə ilk dəfə Ağdamda, Quzanlı Olimpiya kompleksinin meydançasında meydana çıxdı. Azerisport.az xəbər verir ki,Azərbaycan derbisi sayılan “Qarabağ”– “Neftçi”görüşü bir sıra tarixi məqamlarla yadda qaldı.
2000 yerlik arenada 3000-dən çox azarkeşin izlədiyi oyunda “Qarabağ” 5-ci dəqiqədə hesabı açdı. Adamiya Aqollinin sol cinahdan asmasına başla dəqiq toxundu və qol pərdəsini açdı. Bu 30 yaşlı forvardın çempionatda 15-ci qolu olmaqla yanaşı, bombardirlər yarışında əks düşərgədə olan Bahodir Nasimova çatmasına səbəb verdi. Amma bu hələ son deyildi. 8 dəqiqə sonra Sadiqovun qapıya zərbəsi müdafiəçilərdən döndü. Amma fürsətciliyini göstərən gürcü bu dəfə də hamıdan qabaq tərpənərək üstünlüyü 2 qat artırdı. İkinci yarının startında isə komanda böyük hesablı qələbəni rəsmiləşdirdi. Rəşad Sadiqova qarşı kobudluqdan sonra Adamiya het-trikini reallaşdıraraq,qollarının sayını 17-yə çatdırdı. Maraqlıdı ki, ötən il bu meydanda baş tutan eyni görüşdə “Qarabağ”2:0 qələbə qazanmış, Adamiya dublla yadda qalmışdı. Ümumiyyətlə, “Adam”Azərbaycan çempionatlarında vurduğu qolları 52-yə çatdıraraq ən məhsuldarlar siyahısında 28-ci sıraya yüksəldi.
Beləliklə, ağdamlılar sonuncu ev oyununda 3:0-lıq qələbə qazanaraq gümüş uğrunda mübarizəsini davam etdirdi. “Qarabağ” bu qələbəylə mövsümün ən yaxşı ev komandası olduğunu göstərdi. Komanda evdə ən çox xal toplayan komanda oldu – 36 xal. “Qarabağ” eyni zamanda cari mövsüm 4-cü 3:0-lıq qələbəsini qazandı. Daha öncə, “Gəncə”, MOİK, “Qəbələ” eyni aqibətə düçar olmuşdu. “Qarabağ” eyni zamanda tarixində ilk dəfə paytaxt klubunu böyükhesabla məğlub etdi. “Neftçi” üzərində qələbə komandanın Quzanlıda ilk böyükhesablı qələbəsi kimi tarixə düşdü.
Eyni zamanda Adamiyanın het-triki eyni zamanda 5 illik sindroma son qoydu. Beləki, “Adam” 2006-cı ildən sonra “Qarabağ”da het-trik edən ilk futbolçu oldu. Sonuncu dəfə “Qarabağ”da Samir Musayev 2005-2006 mövsümündə aprelin 21-də baş tutmuş “Göyəzən” – “Qarabağ” oyununda (1:3) 3 dəfə qola sevinmişdi. Başqa sözlə, 1848 gün sonra “Qarabağ”ın oyunçusu het-triklə yadda qaldı. (klubun saytı)
