18 may 2011 14:01
Genk Bakıya gələ bilər
Azərbaycan çempionu “Neftçi”nin potensial rəqibləri müəyyənləşməkdə davam edir. Azerisport.az xəbər verir ki, artıq Belçikada da cari mövsümün çempionu müəyyənləşib.
Belə ki, çempionluq üçün mübarizə aparan komandaların final mərhələsinin son turunda “Standart” ilə 1:1 hesablı heç-heçəyə nail olan “Genk” Belçikada qızıl medallara sahib çıxıb. Maraq üçün qeyd edək ki, bu oyuna eyni xalla çıxan tərəflər həlledici qarşılaşmada da bərabərə qalmasına rəğmən, çempion məhz “Genk” elan olunub. Çünki bütövlükdə mövsüm ərzindəki qarşılaşmaları da nəzərə alarkən, üstünlük məhz bu komandaya məxsus idi.
Həlledici qarşılaşmaya gəlincə, matçın 44-cü dəqiqəsində Manqalanın qolu ilə hesabı açan “Standard” hesabı qoruyacağı halda çempionluğunu bayram edəcəkdi. Lakin 77-ci dəqiqədə “Genk”in üzvü Nvanqan cavab qolunu vurmaqla hər şeyi dəyişdi. Belçikanın yeni çempionunu məhz bu futbolçunun qolu müəyyənləşdirdi.
