19 may 2011 14:14
Aleksandr Starkov 2 “azərbaycanlı” oyunçunu milliyə çağırdı
Latviya yığmasının baş məşqçisi Aleksandr Starkov AÇ-2012-nin seçmə mərhələsi çərçivəsində keçiriləcək İsrail, eləcə də Avstriya ilə yoldaşlıq oyunu üçün xidmətindən yararlanmaq istədiyi futbolçuların siyahısını müəyyənləşdirib. Azerisport.az xəbər verir ki, onun dəvət göndərdiyi futbolçular arasında 2 “azərbaycanlı” futbolçu da var.
Bunlar Premyer Liqamızda top qovan Ritus Krjauklis (AZAL) və Andrey Rubindi (Qarabağ). Onların hər ikisi iyunun 4-də İsrail, eləcə də ayın 8-də baş tutacaq Avstriya ilə yoxlama matçında qüvvəsini sınamaq şansı qazanıb. Maraq üçün qeyd edək ki, Avstriya AÇ-2012-nin seçmə mərhələsində millimizin rəqiblərindəndi.
Yeri gəlmişkən qeyd edək ki, həm də “Bakı”nın baş məşqçisi postunda çalışan Aleksandr Starkov ölkəmizdə top qovan latviyalı futbolçulardan birini unudub. O, “İnter”in hücumçusu Girt Karlsonu daimi olaraq milliyə çağırsa da, bu dəfə ona ehtiyac duymayıb.
