19 may 2011 16:11
Porto Manchester United'i də qabaqladı
UEFA Avropa Liqasının dünən keçirilən final matçında “Braga”nı minimal hesabla məğlub edərək çempion olan Portuqaliyanın “Porto” klubu bununla da 7-ci beynəlxalq kubokunu qazanaraq, tarixə düşdü. Azerisport.az xəbər verir ki, bununla da Portuqaliya klubu beynəlxalq arenada ən çox titul qazanan komandaların sıralamasında 9-cu pilləyə yüksəlib.
Daha öncə 1987 və 2004-cü illərdə Çempionlar Liqasının qalibi olan “Porto”, 1987-ci ildə Superkuboka, 2003-cü ildə UEFA Kubokuna sahib çıxmışdı. Portuqaliya klubu həmçinin 1987 və 2004-cü illərdə Dünya Klublar Çempionatını qazanmışdı. Dünən qazanılan kubokla tarixindəki 7-ci beynəlxalq uğuruna imza atan “Porto” bununla hətta 6 kuboklu İngiltərə nəhəngi “Manchester United”i də geridə qoyub.
Qeyd edək ki, Avropanın ən çox beynəlxalq titul qazanan klubu isə “Milan”dı. İtaliya təmsilçisi tarixində 17 dəfə belə uğur qazanıb ki, bu da İspaniyanın “Real” klubundan cəmi 1 kubok çoxdu.
17 – Milan (İtaliya)
16 - Real Madrid (İspaniya)
11 – Ajax (Hollandiya)
11 – Liverpool (İngiltərə)
10 - Juventus (İtaliya)
10 – Barcelona (İspaniya)
8 - Bayern Münih (Almaniya)
8 – Inter (İtaliya)
7 – Porto (Portuqaliya)
6 - Manchester United (İngiltərə)
