22 may 2011 02:16
Almaniya kubokunun qalibi müəyyənləşdi
Almaniya Kubokunun qalibi müəyyənləşib. Azerisport.az xəbər verir ki, kubokun finalında “Schalke” “Duisburg”la qarşılaşmada inamlı qələbə qazanaraq, kuboku başı üzərinə qaldırıb.
Qeyd edək ki, Bundesliqa təmsilçisi olan “Schalke”nin həlledici qarşılaşmadakı rəqibi ikinci Bundesliqada çıxış edən “Duisburg” idi. Berlində keçirilən görüş kifayət qədər qollu alınıb. “Schalke”yə qələbə gətirən qolları 18-ci dəqiqədə Julian Draksler, 22 və 70-ci dəqiqələrdə Klaas-Yan Huntelaar, 42-ci dəqiqədə Benedikt Hövedes, 55-ci dəqiqədə isə Xose Manuel Jurado qeyd edib.
“Schalke” bu qələbə sayəsində tarixində beşinci dəfə bu kuboku başı üzərinə qaldırmış oldu. Bu komanda sonuncu dəfə 2002-ci ildə belə uğura imza ata bilmişdi. 2005-ci ildə isə finala çıxmasına rəğmən, “Bayern”ə 1:2 hesabıyla məğlub olmuşdu.
