23 may 2011 13:43
"Artıq Avroliqanın qrup mərhələsinə vəsiqə qazanmaq vaxtıdı"
“Qarabağ”ın müdafiəçisi Admir Teli vətəni Albaniyaya yollanmazdan önvə azerisport.az saytına müsahibəsində geridə qalan mövsümün ən yaxşılarından biri olmasından danışıb, özünün və komandasının çıxışını dəyərləndirib.
Albaniyalı müdafiəçi öncə komandasının mövsümün qapanış matçında AZAL-a gözlənilməz məğlubiyyətindən danışıb (1:3): “AZAL ilə oyuna biz yaxşı başlamışdıq. İlk qolu da biz vurmuşduq və pis görünmürdük. Lakin sonradan hər şey fərqli məcrada davam etməyə başladı. Üstünlüyü rəqibə verib, onların topla daha çox davranmasına imkan yaratdıq ki, sonda da bu, işimizə yaramadı. Rəqibimiz isə bu şanslardan maksimum yararlandı”.
Admir fasilədən sonra komandasının ifasında heç nə alınmamasının da səbəbini izah edib: “Bütün komanda ilə irəli atıldıq ki, qol vuraq. Nəticədə müdafiəni unutduq. Bu isə təbii ki, rəqin işinə yaradı. Onlar yaranan boşluqlardan yararlanıb, üçüncü qolu vurdular. İndi biz artıq qarşıya baxmalıyıq. Bu uğursuzluğu mütləq unutmalıyıq. Sadəcə, həmin məğlubiyyət bizə bir dəsr oldu”.
“Mövsüm bizim üçün artıq bitib və bundan sonra bütün fikirlərimizi avrokuboklara yaxşı hazırlaşmağa yönəltməliyik. İki il ardıcıl bizə Avropa Liqasının pley-off mərhələsinədək irəliləmək nəsib olub. Lakin bu dəfə çox istəyirik ki, nəhayət qrup mərhələsinə vəsiqə qazanaq. Fikrimcə, bunun əsl vaxtıdı” – deyə, Teli qarşıdakı planlarından danışıb.
Teli, sonda Albaniya yığmasına çağırılmasından da danışıb: “Yığma komandaya dəvət olunmağım məni çox sevindirir. Ümid edirəm ki, komandamızın AÇ-2012-nin seçmə mərhələsi çərçivəsində Bosniya və Herseqovina ilə oyununda meydana çıxa biləcəm”.
