23 may 2011 16:04
AFFA da Jabanın Premyer Liqada çıxışına qadağa qoydu
17 may 2011-ci il tarixində FİFA tərəfindən AFFA-ya ünvanlanmaış No 100094 saylı məktubda “Bakı” FK-nın futbolçusu Silvino Joao De Carvalyonun (Jaba) Braziliyanın “İtuano” klubuna olan borcunun faiz hissəsinin ödənilmədiyi göstərilib. Azerisport.az xəbər verir ki, futbolçunun kluba olan borcu (45 545 ABŞ dolları) “Bakı” klubu tərəfindən ödənilsə də, həmin məbləğin faizləri ödənilməyib (27 dekabr 2009-cu ildən 26 noyabr 2010-cu ilə kimi ümumi məbləğin 5 % hesablanır).
Bununla yanaşı, futbolçu 10 mart 2008-ci il tarixli İdman Arbitraj Məhkəməsinin qərarına əsasən, “İtuano”nun arbitraj xərclərini də qarşılamalıdı (arbitraj xərcləri: 8648 İsveçrə frankıdı). FİFA tərəfindən ödəmənin son tarixi kimi 25 may 2011-ci il göstərilib.
Yuxarıda göstərilənləri nəzərə alaraq, Jabanın AFFA-nın bayrağı altında keçirilən yarışlarda iştirakına qadağa qoyulub. Lakin ümumi məbləğ ödənildikdən sonra futbolçu barəsində çıxarılan qərar qüvvədən düşəcək.
Maraq üçün bildirək ki, artıq “Bakı”nın baş məşqçisi Aleksandr Starkov Jabanı yeni mövsümdə komandasında görmək istəmir.
