23 may 2011 11:11
AFFA Böyük oyunla bağlı cəzalarını açıqladı
AFFA İntizam Komitəsinin növbəti iclası keçirilib. Azerisport.az xəbər verir ki, aparılan müzakirələrdən sonra Premyer Liqanın sonuncu – 32-cu turunun oyunları ilə bağlı aşağıdakı qərarlar çıxarılıb:
Premyer Liqanın 32-ci turunun AZAL – “Qarabağ” matçında AZAL-ın 4 futbolçusu sarı vərəqə ilə cəzalandığı üçün klub 1000 manat cərimə olunub.
“Qəbələ” – “Muğan” matçında isə “Qəbələ”nin 4 futbolçusu sarı vərəqə ilə cəzalandığı üçün 1000 manat cərimə olunub.
“Neftçi” – “Xəzər Lənkəran” matçının 53-cü dəqiqəsində “Neftçi”nin futbolçusu Rəşad Abdullayev simulyasiyaya görə ikinci sarı vərəqə alaraq meydandan kənarlaşdırıldığı üçün 1 oyunluq cəzalanıb, klubu 200 manat cərimə olunub. Stadionda hər iki klubun azarkeşləri tərəfindən oturacaqlar sındırılıb. Belə ki, “Xəzər Lənkəran” klubunun azarkeşləri tərəfindən 270 oturacaq, “Neftçi” klubunun azarkeşləri tərəfindən 84 oturacağın sındırıldığı aşkar edilib. Bu səbəbdən də hər iki klub dəymiş zərərə uyğun olaraq, Tofiq Bəhramov adına Respublika stadionunun rəhbərliyinin təqdim edəcəyi hesab əsasında ödəmə etsin.
