25 may 2011 16:37
Əsgər Abdullayev Turanla müqavilə imzaladı
Azərbaycan millisinin, eləcə də AZAL-ın sabiq baş məşqçisi Əsgər Abdullayevin işsiz günləri rəsmən başa çatıb. Azerisport.az xəbər verir ki, təcrübəli mütəxəssis cari mövsüm bir neçə dəfə baş məşqçi dəyişikliyinə əl atan “Turan”la rəsmi müqavilə imzalayıb.
Hələ bir neçə gün idi ki, Tovuz klubunu bundan sonra məhz Abdullayevin çalışdıracağı haqda informasiyalar dolaşmaqdaydı. Lakin o, saytımıza müsahibəsində bu xəbərimiz təkzib etmişdi. Amma artıq gözləntilər özünü doğruldub. Tovuz klubu ilə Əsgər Abdullayev arasında bir illik müqavilə bağlanılıb.
Maraq üçün sonda onu da xatırladaq ki, Əsgər Abdullayev vaxtilə "Olimpik-Şüvəlan" adlanan hazırkı AZAL klubunu 2009-cu ilin noyabr ayında tərk edib və həmin dövrdən etibarən işsiz idi. Lakin o, buna qədər “Şəfa”da və Azərbaycan millisində də işləyib.
