26 may 2011 19:54
Ramiz Məmmədovun komandası yenə qələbəni əldən verdi (YENİLƏNİB)
Bu gün Qazaxıstan çempionatında 13-cü turun oyunları keçirilib. Azerisport.az xəbər verir ki, azərbaycanlı baş məşqçi Ramiz Məmmədovun çalışdırdığı “Atırau” doğma meydanda “Ordabası”yla münasibətlərinə aydınlıq gətirib.
Qeyd edək ki, bu komanda hazırda 19 xalla turnir cədvəlinin 6-cı pilləsində qərarlaşmışdı. Geridə qalan 12 oyunda 6 qələbə qazanıb, 5-də uduzan "Ordabası" sadəcə 1 görüşdə heç-heçə etmişdi ki, o da “Atırau” ilə matça təsadüf etmişdi. 10-cu tura təsadüf edən və “Ordabası”nın meydanında keçirilən qarşılaşmada hesabı Məmmədovun komandasından Bexan açsa da (19-cu dəqiqə), az sonra meydan sahibləri hesabı bərabərləşdirmişdilər. Beləcə, tərəflər hərəyə 1 qolla 1 xala razılaşmışdılar.
Elə bu dəfə də eyni ssenari təkrarlandı. Lakin Atıraudakı qarşılaşmada qollar ikinci hissədə vuruldu. 60-cı dəqiqədə meydan sahibləri hesabı açsa da, son dəqiqələrdə qonaq komanda lazım olan 1 qolu vura bildi. Beləcə, "Atırau" yenə "Ordabası" ilə dueldən 1 xalla ayrıldı
Halbuki, həmyerlilərimizin komandası üçün bu görüşdə qələbə qazanmaq çox vacib əhəmiyyət daşıyırdı. Çünki ilk altılığa düşməyə çalışan “Atırau” 7-ci pillədə qərarlaşmışdı və bu rəqibindən 5 xal geridə qalırdı. Qələbə qazanacaqları halda “Ordabası” ilə fərq ikiyə düşəcəkdi. Amma heç-heçə aradakı xal fərqinin qüvvədə qalmasına şərait yaratdı.
Qazaxıstan Superliqası
13-cü tur
26 may
ATIRAU - ORDABASI - 1:1 (0:0)
Qollar: Colçiyev, 60 - Vaqner, 84.
| 1 | Lokomotiv | 13 | 8 | 3 | 2 | 18 | - | 12 | 27 |
| 2 | Aktobe | 13 | 8 | 2 | 3 | 23 | - | 11 | 26 |
| 3 | Shakhtyor | 13 | 8 | 2 | 3 | 23 | - | 12 | 26 |
| 4 | Zhetysu | 13 | 7 | 4 | 2 | 21 | - | 8 | 25 |
| 5 | Irtysh | 13 | 7 | 2 | 4 | 24 | - | 16 | 23 |
| 6 | Ordabasy | 13 | 6 | 2 | 5 | 16 | - | 10 | 20 |
| 7 | Atyrau | 13 | 3 | 6 | 4 | 10 | - | 14 | 15 |
| 8 | Tobol | 13 | 4 | 2 | 7 | 18 | - | 19 | 14 |
| 9 | Kairat | 13 | 4 | 2 | 7 | 15 | - | 22 | 14 |
| 10 | Taraz | 13 | 4 | 0 | 9 | 9 | - | 16 | 12 |
| 11 | Kaisar | 13 | 2 | 2 | 9 | 7 | - | 29 | 8 |
| 12 | Vostok | 13 | 1 | 5 | 7 | 9 | - | 24 | 8 |
