27 may 2011 13:11
Qazaxıstan millimizlə oyun öncəsi daha bir itki ilə üz-üzə
AÇ-2012-nin seçmə mərhələsində millimizin rəqiblərindən olan Qazaxıstan yığması daha bir itkiylə üzləşə bilər. Azerisport.az xəbər verir ki, “Aktobe”nin şərəfini qoruyan Sergey Lisenkov dünən keçirilən Qazaxıstan Superliqasının “Kayrat”la oyununda zədələnib.
Hazırda onun Azərbaycan yığması ilə ev oyununda iştirak edib-etməyəcəyi hələlik dəqiq deyil. Lisenkovla bağlı yekun qərarın qarşıdakı günlərdə veriləcəyi bildirilir.
Qeyd edək ki, Qazaxıstan yığmamızla ev oyununda Andrey Karpoviç, qapıçı David Loriya, eləcə də hücumçu Murat Tleşevin xidmətindən yararlana bilməyəcək. Qazaxıstan – Azərbaycan görüşü iyunun 3-də Astanadakı “Astana Arena”da keçiriləcək.
