27 may 2011 16:21
“Tağızadə Neftçi ilə bağlı açıqlamalarında diqqətli olmalıdı” (FOTO)
“Neftçi”nin İctimaiyyət və Mətbuatla Əlaqələr Departamentinin rəhbəri Elnur Əşrəfoğlu komandanın əvəzedici heyətində məşqçi kimi çalışan Zaur Tağızadənin istefa verərək “Qarabağ”a getdikdən sonra verdiyi bəzi açıqlamalara münasibətini açıqlayıb. Azerisport.az saytına açıqlamasında o, keçmiş oyunçularının “ağ-qaralar”dan narazı qalmasının heç bir əsasının olmadığını iddia edib:
“Neftçi” həmişə öz tarixinə hörmətlə yanaşıb. Klub prezidenti Sadıq Sadıqov tərəfindən də Zaur Tağızadəyə həmişə hörmət göstərilib. Ona hətta əsas komandamızda məşqçi kimi çalışmaq da təklif olunmuşdu.
“Neftçi” həmişə öz tarixinə hörmətlə yanaşıb. Klub prezidenti Sadıq Sadıqov tərəfindən də Zaur Tağızadəyə həmişə hörmət göstərilib. Ona hətta əsas komandamızda məşqçi kimi çalışmaq da təklif olunmuşdu.
Zaur açıqlamalarında bir qədər diqqətli olmalıdı. Bu, ona başucalığı gətirmir. Ümumiyyətlə, o, diqqətsizlikdən danışa bilməz. “Xəzər Lənkəran”la çempionatın son həlledici oyunundan öncə biz Zaur üçün vida matçı keçirmək istəyirdik. Özü də bunu bilirdi. Lakin o, həmin vaxt ölkədə deyildi. Hətta onun üçün xüsusi forma da hazırlamışdıq. Hər halda Tağızadə buna layiq idi. Çünki “Neftçi” üçün çox güc sərf edib, klubumuzun canlı əfsanələrindən biri sayılır. Ola bilər ki, o, kimdənsə incikdi. Amma bu da keçmiş “Neftçi”li kimi komandası haqda elə danışmağa əsas vermir”.
Əşrəfoğlu hər şeyə rəğmən keçmiş futbolçularıyla fəxr etdiklərini və gec-tez Tağızadə üçün vida matçı keçirəcəklərini bəyan edib: “Zaurun “Qarabağ”a gedişi də elə bizim uğurumuzdu. Necə ki, vaxtilə Qurban Qurbanovla Rəşad Sadıqov da onun kimi “Neftçi”dən gedib. Ümumiyyətlə, Premyer Liqada kifayət qədər keçmiş “Neftçi”li var. Bu da bizi ancaq və ancaq sevindirə bilər. Zaur üçün vida matçına gəlincə, onu mütləq keçirəcəyik. Bizdə hətta Zaur üçün xüsusi forma da hazırlanıb”.
