27 may 2011 16:56
Yoahim Löv: Uruqvayla qarşılaşma Azərbaycanla oyun öncəsi məşq xarakteri daşıyır
AÇ-2012-nin seçmə mərhələsində millimizin rəqiblərindən olan Almaniya yığmasının baş məşqçisi Yoahim Löv Avstriya və Azərbaycanla rəsmi oyunlar öncəsi keçirəcəkləri Uruqvayla yoldaşlıq görüşünün əhəmiyyətindən danışıb. Azerisport.az xəbər verir ki, o, bu haqda açıqlamasında aşağıdakıları dilə gətirib:
“Uruqvayla qarşılaşma seçmə mərhələ oyunları öncəsi bizim üçün son məşq xarakteri daşıyır. Düzdü, cənubi amerikalıların oyun stili Avstriya və Azərbaycanınkından fərqlənir. Amma mən yenə oyunçularımı məhz seçmə oyunlara hazırlıq üçün yükləyəcəm. Bizim Avstriya və Azərbaycan üzərində qələbə qazanmaqla Avropa Çempionatının əsas mərhələsinə vəsiqəni təmin etmək üçün əla şansımız var. O zaman seçmə mərhələnin qalan oyunlarına daha arxayın çıxa bilərik” – deyə, Yoahim Löv alman həmkarlarımıza açıqlamasında qeyd edib.
Qeyd edək ki, Almaniya yığması Avstriya ilə iyunun 3-də, millimizlə isə iyunun 7-də qarşılaşacaq. Bu oyunlar öncəsi Bundestim mayın 29-da Uruqvayla sınaq matçına çıxacaq.
