29 may 2011 02:19
Ramiz Məmmədov Atırau`dan ayrıldı
Qazaxıstanın "Atırau" klubunun azərbaycanlı məşqçiləri vətənə dönüb. Azerisport.az xəbər verir ki, mayın 26-da 13-cü tur çərçivəsində "Ordabası" ilə ev oyunundan (1:1) sonra baş məşqçi Ramiz Məmmədov və köməkçiləri - Elxan Abdullayevlə Mehman Baxışov Bakıya qayıtmaq qərarına gəlib.
Buna isə AÇ-2012-nin seçmə mərhələsi çərçivəsində Qazaxıstan çempionatında 10 günlük fasilənin yaranması imkan verib. Belə ki, "Atırau" iyunun 6-da Astanada "Lokomotiv"in qonağı olacaq.
Məhz həmin oyuna qədərki fasilədən yararlanan Ramiz Məmmədov və köməkçiləri ailələrinə baş çəkmək üçün vətənə dönüblər. Onlar bir neçə gün sonra yenidən Qazaxıstana yola düşəcəklər. "Atırau"nun hazırda 14 xalla turnir cədvəlində 7-ci pillədə qərarlaşdığını da xatırladaq.
