2 iyun 2011 13:16
Kamran Ağayev: Rekord haqda yox, bu barədə düşünməliyik
Azərbaycan yığmasının və “Xəzər Lənkəran”ın qapıçısı Kamran Ağayev AÇ-2012-nin seçmə mərhələsi çərçivəsində sabah keçiriləcək Qazaxıstanla oyun öncəsi azerisport.az saytının sullarını cavablayıb:
- Qazaxıstanla oyundan nə gözləyirsiz?
- Biz heç vaxt meydana məğlub olmaq üçün çıxmırıq. Bu görüş bizim üçün çox vacib əhəmiyyət daşıyır. Lakin mən hesab etmirəm ki, qazaxlarla görüş Almaniya ilə oyundan daha vacibdi.
- Biz heç vaxt meydana məğlub olmaq üçün çıxmırıq. Bu görüş bizim üçün çox vacib əhəmiyyət daşıyır. Lakin mən hesab etmirəm ki, qazaxlarla görüş Almaniya ilə oyundan daha vacibdi.
- Axı qrupdakı əsas rəqibimiz məhz Qazaxıstandı...
- Ola bilər. Amma gəlin məsələyə bu yöndən də baxaq: doğma publika önündə, evdə uduzmaq heç vaxt normal qarşılana bilməz. Rəqib lap Almaniya yox, İspaniya, Braziliya da olsa belə. Xatırlayırsızsa, mən Türkiyə ilə oyun öncəsində də belə danışırdım.
- Bəli, bu, Avstriya ilə uğursuz oyunun ardından idi...
- Düzdü. Onda çoxları mənə deyirdi ki, Kamran artıq özünü ulduz hesab edir, nə danışdığını bilmir, özünü yuxarıdan aparır. Nəticəni hamı gördü. Biz Türkiyəyə qalib gəldik.
- Əgər Qazaxıstanı səfərdə yensək, artıq indidən seçmə mərhələlərdəki ən yüksək göstəricimizə imza ata bilərik...
- Hesab etmirəm ki, bizim bir oyunla rekorda imza atmağımız obyektiv qiymətin verilməsinə səbəb olsun. Yenə təkrar edirəm: evdə uduzmaq olmaz. Qarşıda dörd ev oyunumuz var. Niyə həmin oyunlarda da qələbə qazanmayaq? Bu haqda düşünməliyik. Daha rekordlar barədə yox. Şəxsən mənim üçün faciə onda olacaq ki, Qazaxıstana qalib gəlib, Almaniyaya uduzacağıq.
- Bu dəfə milliyə dörd qapıçı çağırılıb. Niyə?
- Bu, baş məşqçinin qərarıdı.
- Qazaxıstan yığması bu seçmə tsikldə hələ qol da vura bilməyib. Bu, sizin üçün hansısa psixoloji təsir yarada bilməz ki?
- Mənim üçün Qazaxıstanın kimə nə qədər qol vurması qətiyyən maraqlı deyil. Bu seçmə mərhələdə bizim artıq bir quru oyunumuz var. Türkiyə ilə görüşdə qapımızı toxunulmaz saxlaya bilmişik. Amma bu futboldu, qol buraxmamaqla yanaşı, həm də qol vurmaq lazımdı.
- Hazırda özünüzü necə hiss edirsiz? Bildiyimizə görə, bu qarşılaşmada meydana çıxa bilməmək qorxusu var...
- Hazırda özümü normal hiss edirəm. Kiçiç narahatlıqlar olsa da, meydana çıxmağa hazıram.
