2 iyun 2011 01:30
“Azərbaycanlılar nə istəyirlər, düşünsünlər”
AÇ-2012-nin seçmə mərhələsi çərçivəsində iyunun 3-də Astanada Azərbaycan millisini qəbul edəcək Qazaxıstan yığmasının aparıcı üzvlərindən Sergey Qeteriyev ölkəsindən olan jurnalistlərə iddialı açıqlamalar verib. Azerisport.az xəbər verir ki, o, müsahibəsində bunları dilə gətirib:
“Hər oyun öncəsi olduğu kimi, Azərbaycanla qarşılaşma ərəfəsində də əhval-ruhiyyə yaxşıdı. Məşqlərimizi davam etdiririk. Azərbaycanda hər kəs onların qələbə qazanacağını düşünür? Onlar Azərbaycan nə istəyirlər, düşünsünlər. Bizə də qələbə qazanmaq vaxtıdı. Azarkeşlərimizi qələbə ilə sevindirmək üçün əlimizdən gələni edəcəyik”.
Maraqlıdı ki, qazax həmkarlarımız vaxtilə ona Azərbaycan millisindən təklif alması barədə şayiələrə cavab istəsə də, Qeteriyev bunları təsdiqləməyib. Amma o, komandamızı dəyərləndirməyi unutmayıb: “Bizim əsas üstünlüyümüz evdə oynamağımızdı. Bildiyim qədərilə, Azərbaycan yığması da süni örtüklü meydançada hazırlaşır. Mən onların iki oyununa baxmışam. Deyə bilərəm ki, sürətli, topla yaxşı davrana bilən komandadı. Amma istənilən halda Azərbaycanla oyun bizim üçün dönüş nöqtəsi olmalıdı”.
