2 iyun 2011 15:41
“Kimin güclü olduğu sabahkı oyunda bilinəcək”
AÇ-2012-nin seçmə mərhələsində millimizin rəqibi olan Qazaxıstan yığmasının baş məşqçisi bu gün mətbuat konfransı keçirib. Azerisport.az xəbər verir ki, çexiyalı mütəxəssis sabah keçiriləcək Qazaxıstan – Azərbaycan oyunu öncəsində bunları dilə gətirib:
“Bu oyuna böyük maraq olduğunu görürəm. Çox istərdim ki, oxşar maraq azarkeşlərdə də olsun” – deyə, Beranek rus dilində jurnalistlərə səslənib. İngilis və digər dilləri də bilən mütəxəssis hər halda bu dildə daha asan olacağını düşünmüşdü.
“Heyətlə bağlı heç nə deməyəcəm. Heç qapıçının da adını açıqlamayacam. Bütün bunları ancaq matç zamanı biləcəksiz. Deməzdim ki, hazırlıqdan tam razıyam. Məşqçi heç vaxt razı ola bilməz. Amma toplanış üçün vacib olan nə lazım idisə, onları həyata keçirmişik” – deyə Beranek qeyd edib.
Maraqlıdı ki, kapitan Kayrat Nurdauletovla birgə jurnalistlər önünə çıxan Beranek də, yetirməsi də millimizlə heç-heçənin onlar üçün faciə olmayacağını dilə gətirdilər. Özü də çexiyalı mütəxəssis bir neçə saatlıq fasilədən sonra məhz millimizin baş məşqçisinin işlətdiyi bir fikri təkrarlamış oldu: “Faciə onda olur ki, kimsə ölür”.
Beranekin sözlərinə görə, Azərbaycanla Qazaxıstan arasındakı görüşü derbi hesab etmək olar: “Mən bu iki ölkənin gənclərdən ibarət komandaları arasındakı oyunu izlədim. Çox maraqlı mübarizə idi. Azərbaycan yığması cəlddi, sürətlidi. Xüsusilə də Vaqif Cavadovu, Ruslan Abışovu, Mahir Şükürovu (baxmayaraq ki, sonuncu Astanaya aparılmayıb – red.) qeyd etmək istərdim. Biz bu seçmə tsikldə ilk qolumuzu vurmaq, ilk xalımızı qazanmaq istəyirik. Amma Azərbaycan da Astanaya qələbə üçün gəlib. Odu ki, mən şansların 50-nin 50-yə olduğunu düşünürəm”.
Qazaxıstan yığmasının çalışdırıcısı həmçinin bu ölkədə fəaliyyət göstərən “Atırau”nun azərbaycanlı baş məşqçisi Ramiz Məmmədovdan məsləhət alıb-almamasına dair sualı da cavabladı: “Mən Ramizlə əlaqə saxlamamışam. Onun oyunçularından da komandamda yoxdu. Həm də mənim ondan bu oyun üçün hansısa məsləhət almağım düzgün çıxmazdı”.
Beranek komandamızı nə dərəcədə öyrəndiklərinə dair sualı isə belə cavablandırıb: “Biz standart vəziyyətlər üzərində çox işləmişik. Bilirik ki, onlar daha çox cərimə zərbələrindən və künc zərbələrindən vururlar. Buna görə də onlara belə imkanlar yaratmamağa çalışırıq. Həyəcan hiss edirəmmi? Əlbəttə. Axı sabah oyundu. Bu oyunda emosiya da olacaq. Çox güman ki, kim özünü daha sakit apara, ələ ala bilsə, o da qələbə qazanacaq”.
Qazaxıstanın çalışdırıcısı sonda bunları dilə gətirib: “Mən bütün futbolçularımdan xahiş etmişəm ki, ürəklə oynasınlar. Hər halda onlar indi yığma üçün oynayacaqlar və hər şeyi özləri başa düşməlidilər. Yoahim Lövün sözlərinə gəlincə, kimin güclü olduğunu sabahkı oyun göstərəcək. Azərbaycana hörmək etsək də, qorxmuruq”.
