2 iyun 2011 10:42
Rəşad Sadıqov: Bu görüş karyeramın ən vacib oyunu ola bilər
Yığmamızın kapitanı, “Qarabağ”ın müdafiəçisi Rəşad Sadıqov bu gün AÇ-2012-nin seçmə mərhələsinin Qazaxıstanla səfər oyunu öncəsi Astanada keçirilən mətbuat konfransında jurnalistlərin suallarını cavablandırıb. Azerisport.az onun açıqlamaları ilə sizi də tanış edir.
“Biz heç kimə nəyisə sübut etməyə çalışmırıq. Xüsusilə də Almaniya yığmasının baş məşqçisi Yoahim Lövə. Bizə öz baş məşqçimizin və azarkeşlərimizin fikirləri maraqlıdı. Qazaxıstanla görüş mənim karyeramda ən vacib görüşlərdən biri, bəlkə də ən vacibi ola bilər. Niyə? Çünki futbolumuzun inkişafı ilə bağlı deyilənlərin doğru olub-olmaması böyük ölçüdə məhz bu görüşdə bilinəcək. Əgər uğur qazana bilməsək, o zaman tənqidlər hələ uzun müddət səslənəcək” – deyə Sadıqov bildirib.
Kapitanın fikrincə, onlar hələ Almaniya ilə oyunu düşünmürlər və bütün fikirlərini qazaxlarla matça yönəldiblər: “Biz hələlik Almaniya ilə oyunu düşünmürük. Bütün fikrimizi qazaxlarla matça yönəltmişik. Bunun üçün məşqlərimizi də süni örtükdə həyata keçirirdik, rəqibi öyrənməyə çalışırdıq. Almaniya ilə görüş haqda bu oyundan sonra düşünərik”.
Sadıqov qarşıdakı oyunda favoritin olmadığını düşünür: “İndi Qazaxıstan tamamilə başqa komandadı. Onlar xüsusilə fiziki hazırlıqlarına görə yaxşı təsir bağışlayırlar, daha təcrübəlidilər”.
Sadıqov həmçinin Astanada qazanılacaq mümkün qələbəyə görə nə qədər mükafat alacaqlarına dair sualı isə belə cavablayıb: “Bizdə mükafatlar oyundan öncə müzakirə olunmur. Adətən paltardəyişmə otağında danışırıq (gülür). Amma biz hələ o barədə düşünmürük. Bizim üçün hər şeydən vacibi qələbə qazanmaqdı”.
