3 iyun 2011 15:16
Qarabağ`lı futbolçu Starkovu çətin duruma saldı
“Qarabağ”ın yarımmüdafiəçisi Andrey Rubin “Bakı”nın baş məşqçisi Aleksandr Starkovu çətin vəziyyətə salıb. Azerisport.az xəbər verir ki, Ağdam klubunun latviyalı orta sahə oyunçusu zədə səbəbindən AÇ-2012-nin seçmə mərhələsinin sabah keçiriləcək ev oyununda ölkəsini yığmasına kömək edə bilməyəcək.
Bu isə, “Bakı” ilə yanaşı həm də Latviya millisini çalışdıran Starkovun az olmayan problemlərini daha da artırıb. Məsələ burasındadı ki, Rubinlə yanaşı latviyalıların ən sərrast hücumçularından sayılan Maris Verpakovski də sabahkı mühüm qarşılaşmada forma geyə bilməyəcək.
Lakin Starkov bu itkilərdən o qədər də təəssüflənmir və bunun müsbət cəhətlərini düşünür: “Heyətimizdə gənc futbolçular olsa da, mən Rubinlə Verpakovskiyə çox güvənirdim. Amma onların yoxluğunda da biz gənc futbolçuların yaranan şansdan maksimum yararlanmasına ümid bəsləməliyik”.
Maraq üçün xatırladaq ki, “Bakı”nın baş məşqçisi ölkəmizdə top qovan oyunçulardan bu dəfə “İnter”in hücumçusu Girt Karlsona ehtiyac duymayıb. Belədə, onun İsraillə oyunda Premyer Liqamızda top qovan futbolçulardan yalnız Ritus Krjauklisin xidmətindən yararlanması mümkün olacaq.
