5 iyun 2011 00:02
Aleksandr Starkov ev məğlubiyyətinə üzüldü
"Bakı"nın baş məşqçisi Aleksandr Starkovun başçılıq etdiyi Latviya yığması AÇ-2012-nin seçmə mərhələsində məğlubiyyətlə üzləşib. Azerisport.az xəbər verir ki, Riqada İsrail millisini qəbul edən latviyalılar meydandan 1:2 hesablı məğlubiyyətlə ayrılıb.
Hesabı 19-cu dəqiqədə Benayun açıb. 43-cü dəqiqədə Ben Haim penaltini dəqiq yerinə yetirərək fərqi artırıb. Latviyalılar isə 62-ci dəqiqədə Aleksandr Çaunanın təsəlli qoluna sevinib.
Starkov bu görüşdə Premyer Liqamızda top qovan futbolçulardan AZAL-ın oyunçusu Ritus Krjauklisa start heyətində şans verib. Paytaxt klubunun futbolçusu 90 dəqiqə meydanda olub. "Xəzər Lənkəran"ın sabiq qapıçısı Denis Romanov isə matçı ehtiyat oyunçular skamiyasından izləyib.
Qeyd edək ki, Starkov "Qarabağ"ın oyunçusu Andrey Rubini də yığmaya çağırmışdı. Lakin sonradan zədə səbəbindən onu heyətdən kənarlaşdırmalı olmuşdu. "Bakı"nın baş məşqçisi "İnter"in oyunçusu Girt Karlsona ümumiyyətlə ehtiyac duymamışdı.
Qələbə sayəsində İsrail xal hesabını 13-ə yüksəldib. Latviyanın 4 xalı var və turnir cədvəlinin 5-ci pilləsində qərarlaşıb.
