5 iyun 2011 01:34
Neftçi`nin serbiyalı qapıçı almaq istəyi dəqiqləşdi
“Neftçi” serbiyalı qapıçı Saşa Stamenkoviçin transferini böyük ölçüdə həll edib. Azerisport.az xəbər verir ki, “Crvena Zvezda”nın qapıçısını heyətinə qatmaqda maraqlı olan Azərbaycan çempionu artıq Serbiya klubu ilə razılığa gəlib.
Bu barədə "Crvena Zvezda"nın idman direktoru Qoran Vasiliyeviç açıqlama verib. O, bildirib ki, yaxşı transfer haqqı təklif edən "Neftçi"nin istəyi klub rəhbərliyi tərəfindən qəbul olunub: "Klub Stamenkoviçin karyerasını "Neftçi"də davam etdirməsinə razılıq verə bilər. Hadisələrin inkişafı da hər şeyin müsbətə doğru getməsini göstərir. Biz istəyirik ki, nəticədən hər kəs razı qalsın”.
Qeyd edək ki, Saşa Stamenkoviç 1985-ci il təvəllüdlüdü. 26 yaşlı qolkiper uzun boyu ilə diqqəti çəkir - 1.94 m. O, karyerası ərzində yalnız Serbiya klublarında çıxış edib. 2003-2005-ci illərdə "Dubocika"da (40 oyun) forma geyinən Stamenkoviç 2005-2006 mövsümündə "Radnicki"nin (36 oyun) uğurları üçün çaşılıb. 2006-2008-ci illərdə "Napredak"ın (67 oyun) formasını geyinən qolkiper 2008-ci lidə "Crvena Zvezda"ya transfer olunub. İndiyə qədər 78 oyunda meydana çıxan Saşa 2009-2010 mövsümündə Serbiya Kubokunu başı üzərinə qaldırıb, Serbiya Super Liqasının gümüş medalını qazanıb. Bu mövsüm o, 20 oyunda komandanın formasını geyinib.
