5 iyun 2011 15:07
AFFA rəhbərliyindən Almaniya mətbuatına şok açıqlama
Türkiyə millisinin baş məşqçisi Qus Hiddinkin “Chelsea”yə, yığmamızın çalışdırıcısı Berti Foqtsun isə qardaş ölkə yığmasına gedəcəyi haqda şayiələr çoxalmağa başlayıb. Azerisport.az xəbər verir ki, Almaniya və Türkiyə mətbuatının hazırda əsas müzakirə mövzusu məhz budu.
Belə ki, “ay-ulduzlular”ın hollandiyalı çalışdırıcısı Belçika ilə səfər oyununda qeydə alınan 1:1 hesablı bərabərlikdən sonra onun xidmətində maraqlı olan “Chelsea”yə getmək barədə suallara bir qədər eyhamlı cavablar verib. Bu üzdən də hazırda müxtəlif variantlar səslənməkdədi.
Almaniyanın Bild qəzeti "Hiddinkin yerinə Berti Foqts Türkiyəyə gedir?" manşetli xəbərdə ingilislərin hollandiyalını aparmaqda qərarlı olduğu bildirilir. Belədə onun yerinə əsas namizədlərdən biri də Foqts göstərilir.
Lakin millimizin çalışdırıcısı sözügedən nəşrə açıqlamasında bunu təkzib edib: “Hazırda Almaniya ilə matça konsentrasiya olmaq istəyirəm. Qazaxıstan qarşısında aldığımız yenilginin acısını, Almaniya qarşısında ən azından heç-heçə etməklə çıxarmaq istəyirəm”.
Lakin bu məsələyə AFFA prezidenti Rövnəq Abdullayevlə Elxan Məmmədovun münasibətləri daha maraqlı olub. Abdullayev "Almaniya qarşısında bərabərlik qeydə alınsa, baş məşqçimiz Foqts, sözləşməsini öz istədiyi tarixə qədər uzada bilər” deyib. Məmmədov isə, "Futbolda hər şey ola bilər. Onunla ömürlük müqavilə də imzayalaya bilərik, Türkiyəyə də gedə bilər”.
