6 iyun 2011 17:30
Blatter Azərbaycan millisinə DÇ-də uğur arzuladı (FOTOLAR)
Xəbər verdiyimiz kimi, bu gün Mərdəkan qəsəbəsində AFFA Futbol Mərkəzinin nəzdində inşa olunmuş “Dalğa Arena”nın açılış mərasimi keçirilib. Azerisport.az xəbər verir ki, tədbirdə FİFA-nın prezidenti Yozef Blatter, UEFA-nın prezidenti Mişal Platini, AFFA-nın prezidenti Rövnəq Abdullayev, FİFA və UEFA-nın nümayəndə heyətinin, həmçinin ölkə futbol ictimaiyyətinin üzvləri iştirak edib.
Y.Blatter, M.Platini və R.Abdullayev «Dalğa Arena»nın qarşısındakı rəmzi qırmızı lenti kəsiblər. Sonra FİFA, UEFA və AFFA nümayəndələri stadiona baxış keçiriblər. Meydana daxil olan qonaqlar burada aşağı yaş qruplarından ibarət yığmaların məşqini izləyiblər. FİFA, UEFA və AFFA prezidentləri üzərində rəhbərlik etdikləri futbol qurumlarının loqotipləri əks olunmuş böyük ölçülü şarların bərkidildiyi ipi kəsiblər. FİFA-nın prezidenti meydanda məşq edən 17 yaşadək qızlardan ibarət Azərbaycan yığmasının üzvlərinə yaxınlaşaraq baş məşqçi Sissi Rayta və rəhbərlik etdiyi komandaya 2012-ci ildə Azərbaycanda təşkil olunacaq 17 yaşadək qızlardan ibarət komandalar arasında dünya çempionatında uğurlar arzulayıb, dünya çempionatı zamanı növbəti dəfə ölkəmizə səfər edəcəyini bildirib.
