7 iyun 2011 17:03
Blatter İçərişəhərdə (FOTOREPORTAJ)
Azərbaycan futbolunun yüzillik tədbirlərində iştirak etmək üçün ölkəmizdə səfərdə olan FİFA prezidenti Zepp Blatter bu gün Bakı şəhərini gəzib, İçərişəhərdə olub. Azerisport.az xəbər verir ki, onu bu səyahəti zamanı AFFA prezidenti Rövnəq Abdullayev başda olmaqla qurumun bir sıra rəsmiləri müşaiyət edib.
Qonaq Bakı şəhərinin tarixi mərkəzi ilə tanış olub. Nazirlər Kabineti yanında “İçərişəhər” Dövlət Tarix-Memarlıq Qoruğu İdarəsindən verilən məlumata görə, tanışlıq Bakının, eləcə də Azərbaycanın ən möhtəşəm və sirli memarlıq abidəsi olan Qız Qalası ilə başlayıb.
Blatterə abidənin tarixi və burada yenicə başlamış bərpa və muzey konservasiyası işləri barədə məlumat verilib. FİFA prezidenti iyunun 7-də keçiriləcək Azərbaycan - Almaniya matçında öz komandalarını dəstəkləməyə gəlmiş alman və yerli futbol azərkeşləri ilə xatirə şəkli çəkdirib. Daha sonra Blatter A.Zeynallı küçəsindəki XV əsrdə tikilmiş və Şirvanşah I Xəlilullah tərəfindən Bakı sakini Qasım bəyə və onun varislərinin istifadəsinə verilmiş 2 mərtəbəli Karvansara barədə məlumatlandırılıb. Qeyd edilib ki, qədim Şərq həyatının ən mühüm atributlarından olan karvansara bu gün təyinatı üzrə istifadə olunmasa da, qədim tariximizin bir parçası kimi buraya gələn qonaqlarda maraq doğurur.
FİFA prezidenti İçəri Şəhərin ən qədim məscidlərindən biri - 1169-cu ildə ustad Nəcəf Aşur İbrahim oğlu tərəfindən inşa edilmiş Aşur məscidi və yaxınlıqdakı Cümə məscidi ilə tanış olub. Sonda Yozef Blatter ötən il bərpa olunmuş “Kiçik Karvansara” abidəsində yerləşən təsviri və dekorativ-tətbiqi incəsənət mərkəzi – “İncəsənət Bağı”nda olub, burada ona və nümayəndə heyətinin üzvlərinə xatirə hədiyyələri təqdim edilib.
