7 iyun 2011 18:04
AFFA kampaniyaya qarşı anti-kampaniyaya əl atdı
Bu gün AÇ-2012-nin seçmə mərhələsi çərçivəsində Tofiq Bəhramov adına Respublika stadionunda Azərbaycan və Almaniya milli komandası qarşılaşacaq. Azerisport.az xəbər verir ki, bir neçə gün öncə səfərdə Qazaxıstana uduzduqdan sonra, millimizin azarkeşləri bu dəfəki oyunda stadiona getməkdə elə də maraqlı deyil.
Belə ki, artıq bəzi fanat qruplaşmaları, fan-klublar hətta tərəfdarları Almaniya ilə oyuna getməmək üçün kampaniya da aparmaqdadı. Buna cavab olaraq, AFFA da bəzi fan-klubların rəhbərlərinin köməyinə ehtiyac duyub. Belə ki, federasiya rəhbərliyi də AFFA-nın rəsmi saytında bəzi fan-klub fəallarının vasitəsilə azarkeşləri Almaniya ilə oyuna səsləyib. Həmin müraciətləri olduğu kimi təqdim edirik:
Elmir Şərifli (Sektor-11 fan-klubunun rəhbəri): «Bütün azarkeşləri Almaniya yığması ilə oyunda millimizə dəstək olmağa çağırıram. Bu prinsipial oyunda yumruq kimi birləşib millimizi sonacan dəstəkləməliyik. Futbolçularımızı ruhdan salmağın heç bir mənası yoxdur. Futbolda udmaq da olur, uduzmaq da. Qazaxıstan yığmasına məğlubiyyətə görə millimizə arxa çevirməməliyik. AFFA rəhbərliyi Sektor-11 fan-klubuna pulsuz bilet verməklə öz dəstəyini nümayiş etdirib. Biz də öz növbəmizdə tribunalardan millimizi dəstəkləyəcəyik».
Toğrul Səfərli (Sektor-11 fan-klubunun idarə heyətinin üzvü): «Milli komanda hamımızındır. Onları ruhdan salmamalıyıq. İndi bayraq, himn, vətən uğrunda birləşmək vaxtıdır. Belə prinsipial oyunda futbolçuların və məşqçi heyətinin əhvalını korlamamalıyıq. Biz Sektor-11 olaraq millinin son məşqində iştirak edib, onlara mənəvi dəstək olduğumuzu nümayiş etdirmişik. Digər fan-klublardan da bizə qoşulmalarını, millimizə dəstək olmalarını gözləyirik. Yenə deyirəm himnə, bayrağa vətənə görə, Azərbaycan adına görə millimizdən dəstəyimizi əsirgəməməliyik. Buradan futbolçulara səslənirik: Biz daim sizin tərəfinizdəyik».
Elçin Həsənov («İnter» klubunun İctimaiyyətlə Əlaqələr üzrə kordinatoru): «Hər oyunda millimizə öz dəstəyimizi nümayiş etdirmişik. Almaniya ilə oyunda da fan-klub olaraq mütəşəkkil şəkildə tribunalardakı yerimizi alacağıq. Artıq bununla bağlı xüsusi hazırlıq görmüşük. Bayraqlarla, şərflərlə «silahlanmışıq». Nəticədən asılı olmayaraq, 90 dəqiqə dəstəyimizi nümayiş etdirəcəyik. Bütün azarkeşləri oyunun son fitinədək millimizə dəstək olmağa səsləyirəm».
Elməddin Cəfərov («Şəfəq» fan-klubunun rəhbəri): «Biz «Şəfəq» fan-klubu olaraq sonadək millimizə dəstək olacağıq. Almaniya yığması ilə oyunda dəstəkdən çox şey asılıdır. Futbolçular azarkeş dəstəyini hiss edəndə daha həvəslə oynayırlar. Onlar da istəmirlər ki, meydanı məğlub tərk etsinlər. Hər şey birdən-birə qurulmur. Bu futboldur. Yavaş-yavaş inkişaf edir. 4-5 il əvvəlki futbolumuz ilə müqayisədə xeyli yol qət etmişik. Futbolumuza rəhbərlik edən şəxslər öz işlərini çox yaxşı bilirlər. Bir daha tribunalara təşrif buyuracaq azarkeşləri millimizə dəstək olmağa çağırıram».
