8 iyun 2011 03:14
Yığmamızın rəqibi Starkovu da məyus etdi
Ötən gecə Avropanın yaşıl meydanlarında AÇ-2012-nin seçmə mərhələ həyəcanı ilə yanaşı bir sıra yoldaşlıq görüşləri də keçirilib. Azerisport.az xəbər verir ki, bu yoldaşlıq oyunları içində sadəcə Avropanın yox, dünyanın müxtəlif ölkələrini təmsil edən yığmalar qüvvəsini sınayıb.
Avstraliya – Serbiya, Yaponiya – Çexiya, eləcə də Rusiya – Kamerun qarşılaşmaları elə başladığı kimi də başa çatıb – 0:0. Sinqapur isə Maldiv adalarını darmadağın edib. Koreya Qananı məğlub yola salarkən, Norveç də Litvadan güclü olub. Qabon isə doğma meydanda Qambiyaya yenilgidən qaça bilməyib.
Daha maraqlı qarşılaşmalardan biri İrlandiya və İtaliya yığmaları arasında baş tutub. İrlandlar 2 cavabsız qol vuraraq, gözlənilməz qələbəyə seviniblər. Lakin son dünya çempionu İspaniya Venesuela ilə qarşılaşmada oxşar sensasiyaya imkan verməyib.
“Bakı”nın baş məşqçisi Aleksandr Starkovun çalışdırdığı Latviya yığması isə səfərdə Avstriyanın qonağı olub. AÇ-2012-nin seçmə mərhələsində millimizlə eyni qrupda yer alan avstriyalılar ölkəmizdə çalışan mütəxəssisə məğlubiyyət acısı daddırıblar. Bu görüşdə millinin heyətinə dəvət etdiyi “Qarabağ”ın oyunçusu Andrey Rubinin xidmətindən yararlana bilməyən Starkov digər “azərbaycanlı”ya – AZAL-ın üzvü Ritus Krjauklisə də forma şansı qazandırmayıb. “Zolaqlılar”ın baş məşqçisi sadəcə “Xəzər Lənkəran”ın sabiq qapıçısı Denis Romanovu 90-cı dəqiqədə meydana buraxıb.
Yoldaşlıq oyunları
7 iyun
Avstraliya – Serbiya – 0:0
Yaponiya – Çexiya – 0:0
Koreya – Qana – 2:1
Sinqapur – Maldiv adaları - 4:0
Qabon – Qambiya – 0:1
Norveç – Litva – 1:0
Rusiya – Kamerun – 0:0
Avstriya – Latviya – 3:1
İrlandiya – İtaliya – 2:0
Venesuela – İspaniya – 0:3
